Txernobilgo anabasaren hogeigarren urteurrena hamaika hitz eta irudirekin, berri on samar bakarrarekin (Putinek amore pittin bat eman duela Baikal lakuaren ertzetik pasarazi nahi duten oliobidearen auzian) eta ahanztura kezkagarri batekin igaro da. Iranen ahalegin nuklearren ingurukoa da ahanztura, baina ez kasik topikoa den saihets horretatik, alegia, nuklear ugalketak (zibilak eta are gehiago militarrak) gizateriarentzat ekartzen duen arrisku guztiz sinesgarriaren aldetik. Gutxiegi bederen, hitz egiten da horretaz.

Oraingoz ez da hizpide, ordea, hazten eta sakontzen ari den krisi horri atxikita, gero eta argiago islatzen ari den fazeta berria: Bush administrazioa Iranen aurka arma atomikoak «prebentiboki» (hau da, nazioarteko zuzenbideari inolako menik egin gabe eta eraso gerra batean) erabili ahal izateko prestatzen arituko litzatekeela. Seymour Hersh kazetari ospetsua izan da, apiril honetan bertan The New Yorker astekarian argitaratu dituen pare bat artikulutan, eszenategiaren oihala altxatzen hasi dena; eta haren izenak merezi duen begiruneagatik besterik ez balitzateke ere, aintzakotzat hartu beharko genuke.

Baina okerrena da oso bestelako aztarna batzuek ere antzeko mezua helarazten digutela: handik eta hemendik, kontserbadore zahar eta berrien bozgorailuetatik, eraso konbentzional baten zailtasuna eta Iranen nuklearizazioaren aurrean «besoak tolestatuta» geratu ezina uztartuz, eraso nuklearrari («mugatua, noski!») atea zabalduko liokeen argudioa entzuten hasi gara, kanpaina orkestratuaren itxura osoa duen sinkronizazioz. Jendaila honek iraganean egindako bilaukeriak nola prestatu dituen gogoratzeak aski izan behar luke alarma argia pizteko.

Mesanotxean Biblia beti Apokalipsiaren orrialdeetatik zabalik, eta erreparo gizakoiak azkeneko mozkorraldiaren txahalarekin komuneko zulotik joanak dituzten tipo hauek «ez direla horrenbesteraino ausartuko» deliberatzen badugu, besterik gabe, hutsegite handia egin genezake. Apokaliptikoen garunak ez duelako gureak bezala arrazoitzen, eta guk uste dezakegun baino larriago aurkitzen direlako Irakeko kaka nahastearen ondoren.

Eta, gainera, 1945. urteaz geroztik, gerra galtzen egon den bi kasuetan, Korean eta Vietnamen, bonba atomikoa erabiltzeko tentazioa mahai gainean egon zelako Washingtonen. -