MORGA

Baldintzak ezin hobeak izan ziren igande goiz bateko plana egiteko, eguna eguzkitsua izateaz gain, herritik bertatik ikus daitekeen paisaiak lasaitasun sentsazioa ematen baitu. Gainera, esan daiteke, Morgakoa ez dela ohiko azokak bezalakoa. Baserrietako produktuak saldu zituzten, baina horretaz gain, animalia exotikoen erakustaldia ikusteko aukera egon zen. Haurrak izan ziren erakusketarekin gehien gozatu zutenak, hantxe baitzeuden llamei eta erbiei belarra muturrera ematen. Batek baino gehiagok ezusteko galanta hartu zuen, animalien erreakzioak ez zirelako beti onak izan. Dena den, abere arruntagoak ere bazeuden, hala nola, behiak eta zekorrak.

Esan bezala, baserriko produktuak ziren falta, halako egun bat talorik gabe, euskal pastelik gabe edota txakolin eta sagardorik gabe ez bailitzateke gauza bera izango. Hala eta guztiz ere, animalia bitxien erakusketa ez zen izan Morgako azokaren originaltasun puntu bakarra. Izan ere, herriko frontoian antzinako argazkien erakusketa bat egon zen. Inguruetan bizi izandako pertsonak ziren erretratuetan agertzen zirenak, eta ondorioz, batek baino gehiagok nor edo nor ezagutzen zuen ikustera joan zen.

Era berean, frontoian, Morgako bizilagunek beraiek emandako antzinako etxeko tresnen erakusketa egon zen. Bertan zeuden objektuen artean, plantxak, katilu zaharrak, argizariak, olio bidoiak edota zapatari tresnak aipa daitezke.

Beraz, baserri giroa atzoko azokaren elementu nagusietakoa izan zen. Hala ere, ez zen bakarra izan, plazan artisautza postuak zeuden-eta. Bertara hurbildu zirenek larruzko poltsak, kristalezko hautsontziak edota zurezko belarritakoak erosteko aukera izan zuten.

Hortaz, nahiz eta hegaztirik ez egon, atzoko feria arrakastatsua izan zela esan daiteke.