Gaztetxe Martxa
Leioarainoko bidea ere egin dute jai giroan
Zaldibarretik atera eta Leioaraino heldu da Gaztetxe Martxa asteburu honetan. Bidean hainbat ekintza gauzatu dituzte; hala nola, kalejirak, hitzaldiak, herri bazkariak eta festak. Gainera, ibilbidearen zati handi bat oinez eta txirrinduz egin dute. Horrez gain, larunbatean jai bat egin zuten Iurretako gaztetxean.
BILBO
Gaztetxe Martxak Euskal Herriko herrietan bidaiatzen jarraitzen du. Asteburu honetan Zaldibarretik Leioaraino joan da, eta, bidean, partaideek ekintza asko egin dituzte. Okupazioaren aldeko aldarrikapenak, herri bazkariak eta kontzertuak izan dituzte, martxaren helburua gaztetxeen mugimendua aldarrikatzea bada ere, dibertimenduari tarte bat eskaini nahi izan diote-eta. Larunbata eta igandea Larunbateko ibilaldia Zaldibarretik abiatu zen 10.00etan, eta egun horretan zehar, partaideek oinez egin zuten martxa guztia. Elorrion zeudela, AHTren proiektua aurrera eramatekotan sortuko lukeen kalte ekologikoari buruz hitz egin zuten. Horregatik, Miota mendixkarantz abiatu ziren, eta bertako paisaia ederra ikusita, Abiadura Handiko Trenak ingurumenari egingo liokeen kaltearen kontra protesta egin zuten. Goiza mendian pasa ostean, martxan parte hartu zuten lagunak Elorriora jaitsi ziren, eta 100 bat lagun batu ziren hantxe egindako herri bazkarian. Ondoren, Atxondotik eta Abadiñotik pasa ostean, Durangora heldu ziren. Bertakoek performance batekin agurtu zituzten. Kalejira egin ondoren, Durangoko alde zaharrean triki poteoa egiteko aukera izan zuten. Azkenik martxa Iurretan amaitu zen, eta bukaerako ibilbidea autoz egin zuten. Gainera, afaldu eta gero, herriko gaztetxean antolatutako jai girora murgiltzera abiatu ziren gustura. Anari, Brigada Criminal, Lor eta Lehendakaris Muertos taldeekin, partaideek goizeko ordu txikiak heldu arte festa giroan murgildu ziren. Atzoko martxa 10.00etan atera zen Iurretatik. Ondoren, Gernikako bidea hartu zuen. Hara iritsitakoan, partaideak Astra gaztetxea ezagutzera joan ziren. Goiza herri historikoan pasa ondoren, martxa Larrabetzura abiatu zen. Han 50 bat lagun batu ziren eta gaztetxeen mugimenduaren inguruko bideo bat ikusi zuten. Atsedenaldi bat hartu nahian, martxa Sopelanan gelditu zen bapo jateko.
Bizikletaz eta oinez
Bazkal osteko logalea sartu baino lehen, ibilaldiko kideak txirrinduz joan ziren Berangora eta han zeudela, herrian barrena kalejira egin zuten. Bizikletak alde batera utzi eta Algortaraino oinez hurbildu ziren. Herri horretan 120 bat lagun batu ziren eta Erromorako bideari ekin zioten. Egunean zehar jai giroa nabarmena izan zen eta gauean, Erromoko gaztetxean, hango zenbait talderen kontzertura joateko aukera egon zen. Azkenik, Gaztetxe Martxa Leioara abiatu zen, han afaldu ostean, lotara joateko asmoz. Lotara joan aurretik baina, protestarako tartea izan zuten Gaztetxe Martxako partaideek. Salatu zutenez, Leioako kultur etxeak diru truke egiten ditu ekitaldiak. «Batzartzeagatik 20 euro kobratzen diete kultura taldeei», kritikatu zuten.
|
