Sinadura bilketa Zestoan, etxebizitza politika egokiago bat eskatzeko
ZESTOA
Zestoako hainbat herritarrek sinadura bilketa abian jarri dute Udalari etxebizitza arazoaren inguruan azterketa sakon bat egin dezala eskatzeko. «Herritar guztion etxebizitza eskubidea bermatzeko eta etxebizitza politika egoki bat garatzeko ezinbestekoa iruditzen zaigu herritarroi zenbat etxebizitza eta zer motatakoak nahi ditugun galdetzea, eta herritarrok zer herri eredu nahi dugun argitzea», azaldu zuten sinadura bilketa aurkezteko egindako agerraldian.
Zehazki Zestoako Plangintza Arauen Berrikustea dela-eta, etxebizitza politika egoki bat garatzeko Udalak beharrezko informazioa izatea oinarrizkoa dela adierazi zuten. Besteren artean, herritarrek zer etxebizitza behar dituzten zehazteko inkesta bat bideratzeko eskatu dute. Era berean, herritarren baliabideak aintzat har ditzatela ere eskatu zuten, garrantzi berezia emanda «gazteen auzokideen eta etxebizitza beharrei». Halaber, etxebizitza hazkundeari dagokionez, herritarrek zein herri eredu nahi duten kontuan hartzea ere oinarrizko jo zuten.
|
