PARIS
Nicolas Sarkozy UMP taldeko presidenteak bere alderdi-kideen aurrean egin duen agerraldian ezeztatu egin ditu kargua utziko zuelako zurrumurruak.«Gobernuaren barruan lanean jarraituko dut, frantsesen segurtasunaren alde», esan du Barne ministroak. «Kargua uztearen ondorengo krisialdi politikoak ezkerrari eta alderdi erradikalei mesede egingo zielako», gaineratu du. «Bihotzak eskatzen didana badakit, baita ere buruak agintzen didana», esan du, kargua uzteko asmotan egon dela onartu zuen.
UMPko hainbat goi karguk Gobernua uzteko eskatu diote azken egunetan Sarkozyri. Udazkeneko auzo txiroen matxinadak eta gazteentzako kontratu berriaren auziak kolokan utzi dute De Villepinen Exekutiboa. Bertan jarraituz gero, Clearstream kasuaren zipriztinek bustiko omen dutela uste dute Sarkozyren jarraitzaileek.
Jakinaren gainean
Sarkozyk berak ezetz dioen arren, Clearstream kasuaren berri bazuela salatu du PSren oposizioak (sozialdemokratak).Barne ministroak, ordea, bere burua biktima bezala agertzen jarraitzen du. Alderdi-kideen aurrean «egia osoa» exijitu du; «Errepublikak auziaren muineraino egin dezan eta konpiratzaileak eta faltsutzaileak bazter ditzan».
Errepublikako bazter guztiak ukitu ditu dagoeneko Clearstream auziak. Atzo bertan, Chiracen Kabineteko zuzendari ohi baten etxea miatu zuen Poliziak, François Heilbronnerrena. Oraingoz azken miaketa.
De Villepinen aurkako zentsura mozioa
Alderdi Sozialistak (PS) De Villepin lehen ministroaren aurkako zentsura mozioa aurkeztuko du asteartean, karguan urtea oraindik bete ez duenean hirugarrena. Lasaitasuna adierazten saiatzen ari da lehen ministroa, eta bere atzetik dabiltzan argazkilariei muskuiluak ematen dutela esan die. -
