BILBO

Superligan ari diren bi euskal taldeek Kopako final laurdenetako itzulerako partidak jokatuko dituzte gaur. Lagunakek Pueblaren etxean jokatuko du eta Barañainen ateratako errenta (3-1) defendatzen saiatuko dira nafarrak. Athletickek aldiz, astindu ederra jaso zuen Lezaman (2-4) Rayo Vallecanoren kontra eta oso zaila du finalerdietarako sailkatzea.

Nafarrak dira, beraz, aukera handienak dituztenak hurrengo kanporaketan egoteko. Hala ere, Lagunakek badaki ez dela batere samurra izango. Pueblak bere etxean asko irabazten du eta gainera bere zaleak hasieratik epailea zein aurkariak presionatzen saiatuko dira. Barañaingo nesken entrenatzaileak adierazi zuenez, beroak ere sekulako garrantzia izango du. Gerizpean 30 gradu baino gehiago daude eta bere taldeak tenperatura horrekin nola erantzun dezakeen ikusteke dago.

Athletic finalerdietan egotea ezustekoa izango litzateke. Rayo Vallecanok aurten jokatu dituzten hiru partidak irabazi dizkio, bai Superligan zein Kopan, eta partida Madrilen jokatzen denez zuri-gorrien helburua are zailago bihurtzen da.

Nahiz eta bilbotarrak oso gogotsu zeuden Kopan beste itxura bat emateko, lehenengo unetik gauzak gaizki joan dira. Lehen ordu erdia bete aurretik Rayo 1-3 zihoan irabazten eta horrela ezinezkoa da aurrera egitea.

Gainera, Athleticeko hiru jokalarik ostegun gauean Estatu espainoleko selekzioarekin jokatu dute eta ez dute ia astirik izango egindako ahaleginetik errekuperatzeko.