Juaristi nagusi Arabako bigarren finalaurrekoan
GASTEIZ
Joan den larunbatean, Arabako Bertsolari Txapelketako bigarren eta azken finalaurrekoan, Juan Mari Juaristi izan zen saioan nagusitu eta finalerako txartela eskuratu zuena. Beraz, erabakirik geratu da hilaren 27an Gasteizko Jesus Guridi musika eskolan txapelaren bila lehiatuko diren sei bertsolarien zerrenda: Zigor Enbeita, Asier Otamendi, Manex Agirre, Juan Mari Juaristi, Oihane Perea eta Iñaki Viñaspre. Arratsaldeko bostetan hasiko da saioa.
Lierni Altuna gai-jartzailearen esanetara, kanporaketatik sailkatutako Andere Arriolabengoa, Ruben Sanchez eta Alberto Martinez Betto eta joan den urtean finalean egoteagatik zuzenean finalaurrekoetara sailkatu diren Oihane Perea, Juan Mari Juaristi eta Iñaki Viñaspre aritu ziren lanean Dulantziko saioan.
Aurreko finalaurrekoan bezalaxe, honakoa izan zen bertsolariek osatu behar izan zuten lan puntuagarria: ofiziotan hiruna bertso zortziko nagusian, zortziko txikian eta hamarreko txikian, eta kartzelako lanean bakarka puntuari erantzutea eta gaia emanda bina bertso doinu eta neurri librean. Epaimahaikideek kontuan hartu zituzten bertso guztiak osatu ostean, Juan Mari Juaristi izan zen puntu gehien batu zituena, Oihane Perearen aurretik.
Saio guztian urduritasuna eta tentsioa nabarmenak izan ziren bertsolarien artean, eta horrek hutsegite bat baino gehiago ekarri zituen. Sailkapenean aurrena geratutako bi bertsolariak aritu ziren erosoen arratsaldean. Esan beharra dago ofizioetan bertsolariek ez zutela jakin gaiarekin behar bezala asmatzen.
Honako hau izan zen amaierako epaia: lehenengo Juan Mari Juaristi (284 p. ), Oihane Perea (283,5 p.), Iñaki Viñaspre (280 p. ), Ruben Sanchez (270 p.), Alberto Martinez (260,5 p.) eta Andere Arriolabengoa (232 p.).
|
