Nazioartekotzea bultzatu nahi du Euskadi Intergunek
BILBO
SPRI erakundeak I. Euskadi Intergune 2006 Foroa antolatuko du ekainaren 5ean eta 6an enpresen nazioartekotzea bultzatzeko asmoz. Jardunaldiak Barakaldoko Bilbao Exhibition Centre (BEC) erakustazokan izango dira, eta bertan izango dira SPRIren Kanpo Sareko kide guztiak, hau da, SPRIk 25 herrialde baino gehiagotan dituen agente eta aholkulari espezializatuak, enpresei banan-banan azaltzeko jomugatzat dituzten herrialdeen berezitasunak eta han aurki ditzaketen aukerak. Foro hori hurrengo urteetan ere antolatzea da SPRIren asmoa; «izan ere, ezinbesteko hitzordu eta baliabi- de bilakatu nahi dugu nazioartekotze estrategiak garatu nahi dituzten euskal enpresentzat», azaldu zuten atzo SPRIko arduradunek. Euskadi Intergune Foroaren helburua, aldi berean eta espazio bakar batean, enpresen eskura kanpoko herrialdeei buruzko informazio kooperatiboa jartzea da, enpresek aukerarik onena egin dezaten. Horrela, banakako elkarrizketa bilerak antolatuko dituzte, eta SPRIren Kanpo Sareko agenteek hainbat herrialderi buruzko aholkularitza kualifikatua eskainiko dute, bai merkataritza-kideak eta tokiko bazkideak bilatzeari dagokionez, bai merkataritza eta produktu ezarpenei dagokienez ere.
Laguntzak
SPRIren Internazionalizazio Arloaren xedea enpresen aliatu estrategiko bihurtzea da beren etorkizuneko proiektuetan. Leyre Madariaga SPRIko Internazionalizazio Arloko zuzendariordeak I. Euskadi Intergune Foroa aurkezteko emandako prentsaurrekoan azaldu zuenez, «nazioartekotze prozesua osoa garestia da diru kopuru handia eta denbora asko eskatzen duelako, eta, horrela, komeni da enpresek eskura dituzten laguntza guztiak erabiltzea haren eragina ahalik eta txikiena izan dadin».
|
