DONOSTIA

Jardunaldiek irakasleen prestakuntza hartu zuten ardatz. Alde horretatik, lehenik eta behin, irakasleen hasierako prestakuntzaz jardun zuten. «Goi-mailako Hezkuntzaren Gune Europarrak bultzatuta, irakasle eskoletako egonaldia urtebete luzatuko da», gogorarazi zuten. «Oso interesgarritzat jo da aukera hau ­jarraitu zuten­, ikastetxeen ordezkariek beharrezkoa ikusten baitute maisu-maistra berriek eskola komunitatearen antolamenduaren inguruan jakintza zabala izan dezatela, eta bereziki praktika errealak edukitzea».

Era berean, ikasketa plan berriak izan ditzakeen aldaketez ere aritu ziren, eta, alde horretatik, «curriculumarekiko planteamendu berriek gaitasunen lorpenean» oinarritu behar dutela azaldu zuten. «Erronka berriak ez dira asmo onez soilik betetzen. Berrikuntzak aldaketa metodologikoak eskatzen ditu; irakaskuntza estiloa berritzea, alegia», azaldu zuten. Alde horretatik, plangintzak arrakastatsuak izango badira, Administrazioak beharrezkoak diren baliabideak jarri beharko dituela adierazi zuten, bai langileen taldeari eta bai etengabeko prestakuntzari dagokienez.

Hain justu, irakasleen prestakuntza ardatz hartuta, ikastetxean bertan garatzen dena eta kanpoan egiten dena beharrezko direla azaldu zuten. «Hala ere, gero eta garrantzi handiagoa hartzen ari da ikastetxeetan egiten dena, horrek talde lana eragiten baitu eta eskola bakoitzaren beharretatik sortzen denez gero, gertuagokoa eta aplikagarriagoa gertatzen da», azaldu zuten. Hala eta guztiz ere, irakasle asko dabiltza, ikastetxeetatik kanpo, Hezkuntza Sistemaren laguntzako eta aholkularitzako erakundeetan edo haien bidez, ikastaro eta mintegietan. Alde horretatik, batez ere, teknologia berrietan, hizkuntza prozesuetan, hizkuntza normalizazioetan, aniztasunean eta bizikidetzan, eta metodologian eta ebaluaketan trebatzen ari direla azaldu zuten.