Murnauren «Fausto»ren 80. urtebetetzean, jardunaldiak
DONOSTIA
Murnauk “Fausto” orain dela laurogei urte filmatu zuela-eta, proiekzioak antolatu dituzte gaur eta bihar Filosofia eta Hezkuntza Zientzien Fakultateko areto nagusian, Ibaetan. Gaurkoa, 9.30ean, euskaraz izango da. Biharkoa, berriz, 10.30ean, gaztelaniaz.
Proiektatuko duten “Fausto” Madrilgo Filmategiaren enkarguz Luciano Berriatuak orain dela gutxi zaharberritu duen kopia da, hots, 1926an ikusi ahal izan zutenarekin antz handiena duena. Gainera, jatorrizko partitura ere berreskuratu dute, eta, horri esker, Javier Perez de Azpeitiak zuzenean jo ahal izango du, pianoa lagun, proiekzioak egiten dituzten bitartean.
Berez mutua den arren, filmean, tarteka, badira Goetheren “Fausto”tik hartutako testu batzuk. Testu horiek alemanetik euskaratu ditu Elena Martinezek, eta gaur irakurriko dituzte. Aurkezpena eta gainerako azalpenak ere euskaraz egingo dituzte gaur, 9.30etik aurrera.
Bihar, berriz, filma jatorrizko bertsioan proiektatuko dute, gaztelaniazko azpidatziekin. Ekitaldia 10.30ean hasiko da, eta filma proiektatzeaz gain, Fito Rodriguez irakaslearen “La sombra de Fausto” liburua aurkeztuko dute antolatzaileek. Jatorriz euskaraz idatziriko “Faustoren itzala”ren itzulpena da. Hiruk argitaratu du, Alfonso Sastreren hitzaurre batekin.
|
