BILBO

Hainbat ikastetxetan, espainolari ezetz esan zioten eta euskal egutegiaren aldeko aldarrikapena egin zuten. Are gehiago, «inposaketa eta oztopo guztien gainetik» sei ikastetxeok ireki zituzten ateak ofizialki abenduaren 6an: Aulestiko Urregarai herri eskola, Etxebarriko Manuela Zubizarreta, Lekeitioko Azkue ikastola, Markinako Lea-Artibai tecnic, Ondarroako Zubizahar ikastola eta Amorotoko herri eskola. Horiek hala, horietako zenbait ikastetxetako kideak aritu ziren atzo prentsaurrekoan, eta alboan izan zituztenbabesa ematen Sortzen Ikasbatuaz-eko, IAko, LABeko eta EHBEko kideak.

Aipatu zutenez, jaiegun inposatu horietan espainiar eta frantziar nortasuna bultzatu eta euskal nortasuna baztertzen da. Hauxe salatu zuten: «Bi estatuen handitasunari gorazarre egin eta gure herri txikia ez da errespetatzen; beren kolonietan egindako sarraskiak (Hego Amerikan, Afrikan, Asian edo Europan) ospatu eta zibilizazioa zabaldu zutela ospatzen dute; estatuen hizkuntza bakarraren gehiagotasunezko egoera bultzatu eta euskara mespretxatzen dute; euskaldunon eskubideen gainetik, hezkuntza sistema propioaren gainetik, beren konstituzioak jartzen dituzte».

«Ospa ditzatela haiek egun hauek; euskaldunok baditugu gureak; festa gustuko dugu, baina ez inposaketaren eredu direnean», erantsi zuten, eta hemen euskal egutegia izateko «nahia, eskubidea eta beharra» dagoela agertu zuten.

Abiatutako bideari eusten

Jaiegun eta hezkuntza sistema arrotzei «burua makurtu» gabe, herri honetan orain euskal egutegiaren aldeko hautua egiteko «itxaropen eta konpromiso garaiak» direla adierazi zuten, Hegoaldeko ikastetxeetara administrazioetatik jai egutegi ofiziala heltzen ari baita memento honetan.