GASTEIZ
«Negoziazioa luzea eta gogorra izango da, osasun gastuak aurrekontuen mugak dituelako eta adminsitrazioak ez dutelako borondate politikorik arazo hau konpontzeko», azaldu zuen atzo Mati Iturralde LABeko Administrazioko arduradunak.«Ez da diru arazoa, politika arazoa baizik, nahiz eta negoziazioetan ez jarraitzeko Osakidetzak diru faltaren aitzakia erabili», esan zuen.
Bestalde, LABek aurtengo negoziazioaren egoera gaitzetsi arren, iaz adostutako Lanpostuen Eskaintza Publikoaren (LPE) balioa nabarmendu zuen. «Iaz sinatu genuen LPEren alde gaude. Osakidetzak lanpostuen kopurua 4.000 baino gehiagora igotzeko eta LPE abuztua baino lehen egiteko konpromisoa hartu du», gaineratu zuten.
Sindikatuaren arabera, negoziazioa ezin da atzokoa bezalako bileretan egin, sektoreko mahaian baizik, eta, haren iritziz, Osakidetzak bere eskaintzetan atzera egin du. «Medikuen garapen profesionala hobetzeko eta beren soldata %15 igotzeko prest baino ez dago», esan eta langile guztien baldintzak hobetzeko eskatu zuten.
Azkenik, joan den ostiraleko greba deialdiak erantzun positiboa izan zuela esan zuen Iturraldek, baina gutxiengo zerbitzuen erabilera salatu zuen. Negoziazioetan sindikatuen batasuna ere eskatu zuen LABek.
Bere aldetik, Osakidetza negoziatzeko prest dagoela uste du UGTk, eta atzo sindikatu horrek egindako bileran Zuzendaritzak LPEren epeak betetzeko konpromisoa gogorarazi zuen. Haren ustez, langileen kopuruaren zabaltzeak iaz sinatutako konpromisoa beteko du, «gaur egungo beharrak betetzeko nahikoa izan ez arren».
Horregatik, Lehen Arretan langileen kopurua handitzeko ikerketa bukatzeko eskatu zuen, lanpostu horiek LPEn ere sartzeko. Halaber, lan gehiago duten zerbitzuen ikerketa egin behar dela esan zuen.
Bere aldetik, PSEk Lakuako Gobernuak osasun arloan BPGren puntu bat gehiago gasta dezala eskatu zuen, 500 milioi inguru gehiago.
