DONOSTIA

Gazi-gozoa. Horrelako balioespena egin du Baga Bogako hautetsi Josetxo Ibazetak hiru urte hauetako ibilbideaz galdetuta. Gazia, milaka eta milaka boz paperontzi batera «inpunitate osoz» bota dituztelako, Ibazetak esan duenez. Alderdi politikoek izandako jarrera ere gaitzetsi du Baga Bogako hautetsiak. Hauteskundeak egin ostean eta Baga Bogak eskuratu zituen hiru eserlekue-tan esertzearren, PPrekin izan ezik, gainerako alderdi politikoekin harremanak izan zituzten. «Hau pasada bat da» eta horrelakoak esaten zituzten bitartean, alderdi horiek egoera horretan apartheid-a eraman ahal izan dutela salatu du Ibazetak. Haren esanetan, inork ez du urrats txikiena ere egin egoera honi buelta emateko. «Herritarren borondatea errespeta zezaten» neurri zehatzak proposatu arren, beste alde batera begiratu dutela salatu du Baga Boga Donostiako plataformak. Are gehiago, erraztasunak baino gehiago oztopoak jarri dituztela dio Ibazetak.

Esaterako, Udalbatzaren Organoetako Araudia aztertu ostean, informazio batzordeetan parte hartzeko eskubidea zutela ohartu ziren Baga Bogako kideak. Horretarako, batzordeetako lehendakariak gonbidatu behar zituen. EAkoak, EAJkoak eta PPkoak dira batzordeetako lehendakari, baina guztiek erantzun «oso txarra» eman dutela nabarmendu du. Txosten juridiko bat eskatu zuten eskaria aztertzeko, zuzenean batzordean parte hartzen ez zietelako uzten. EAJko lehendakariak kanporatu ere egin zituen Baga Bogako kideak behin. Ibazetaren esanetan, honako hau dago argi: «Hiru urteotan nabarmen erakutsi digute apartheid egoera gainditzeko ez dutela borondate politikorik izan». -