Gaztetxeak jai herrikoiak nahi ditu Azpeitian
·«Bestelako saninazioak» antolatzeko, ekainaren 7an 21.00etan izango den batzarrean parte hartzeko dei egin dute
AZPEITIA
Azpeitiko gazteek ez dituzte gustuko egun herrian ospatzen dituzten jaiak. «Ez dira herritarrentzat antolatzen, gehiago begiratzen zaio kanpotik etorriko den jendeari. Ikuskizunetara mugatzen dira», adierazi dute eta, askotan, bertokoa baino beste kultura bat bultzatzen dela uste dute. Orokorrean, soilik ikusteko diren ekitaldiak direla esan dute eta, gainera, sexuen arteko parekidetasuna bermatzen ez dela salatu dute.
Aipatutako akatsak San Inazio jaietan ikusten dituzte bereziki. Azaldu dutenez, jai batzorde ireki baterako deialdia egin arren, «ez ereduaren inguruko eztabaidan ez antolaketan ez da bermatzen herritarren parte hartzea», ordurako Udalak egitaraua erabakita duelako.
Aurten bestelako saninazioak nahi dituzte. «Kolorea eta bizitasuna» eman nahi diote jaiei, eta asmo horrekin ekainaren 7an 21.00etan gaztetxean egingo duten batzar batera deitu diete herritarrei.
|
