Arrakastatsua izan zen Iruñerriko Mintza Eguna
·160 lagun baino gehiago bildu ziren Topaguneak antolatutako ekimenean
Mintza Eguna egin zuen joan den asteburuan Topaguneak Iruñerrian. Iruñerriko Mintzakide proiektuko koordinatzaile Oskar Zapataren esanetan, Iruñerrian halako talde bat euskaraz aritzea ez da makala. 160 lagun baino gehiago bildu zituen ekimenak.
IRUÑEA
Euskara barra-barra entzuteko aukera izan zen asteburuan, Iruñerrian, Topaguneak antolatutako lehenengo Mintza Egunean. ‘‘Mingaina askatzeko egunak’’ Euskal Herriko bazter guztietatik Bergara, Bilbo, Donostia, Durango, Erandio, Gernika, Getxo, Hernani, Lasarte-Oria, Muskiz eta Ordiziatik, hain zuzen ere etorritako 160 lagun baino gehiago bildu zituen, euskarazko egun-pasa jai-giroan egiteko asmoz.Iruñeko Gaztelu plazan zen hitzordua, eta inork ez zuen huts egin. Eguerdi-partean hasi zuten Arga ibaiaren ertzean zeharreko ibilaldia, eta Iruñerriko lekurik adierazgarrienetakoak ezagutzeko parada ederra eman zuen. Ibilbidea luzeegia ez egiteko, bermuta hartzeko atsedenalditxoa ere izan zen, Burlatako bide zaharrean, Lagunartea elkartearen parean. Atsedenaldiaren ostean, bidea berriz hartu zuten mintzalagunek, Atarrabiaraino. Bazkaria prest zeukaten orduko, Paz de Ziganda ikastolako jantokian. Bazkaria amaitutakoan, jai giroa aprobetxatuz, mintzakideek eskerrak eman nahi izan zizkieten Donostiako Mintzalagun proiektuan oso garrantzitsuak izan diren lagun biri: Josetxo Errazkini batetik, eta Jokin Sarasolari bestetik. Biek ere Koldo Dometx bitxigileak egindako oroigarri eder bana jaso zuten.
|
