AZPEITIA

45 ontzako enborra zeinek kolpe gutxiagotan moztuz abiatu zen Izarraitz pilotalekuko finala, eta hor garaipena Leitzakoak eraman zuen. 41 kolpe nahikoak izan zituen enborra erdibitzeko, eta gipuzkoarrak 53 behar izan zituen. Ondoren, 45 ontzakoa erlojuz kontra moztu behar zuten, eta Otaegik garaipena lortu zuen, segundo bakar bategatik izan bazen ere. Zizurkildarrak 59 segundo behar izan zituen enborra mozteko, eta bat gehiago Rekondok.

60 ontzakoa zen saioako hirugarren eta azken-aurreko proba, eta hor Rekondok saioa bereganatu baldin bazuen ere, zorte ederra izan zuen.Otaegi abantaila hartuta zihoan, baina adar handi bezain itsusia atera zitzaion, eta hor denbora asko galdu zuen, eta azkenean Rekondok lau segundo kendu zizkion. 2.24 izan zen leitzarraren denbora, eta lau segundo gehiago behar izan zituen zizurkildarrak.

Finala amaitzeko saio bakarra geratzen zen, eta Rekondok hamabost segundoko abantaila zuen alde. Bi 45 ontzako eta bi kana-erdiko moztu behar zituzten, eta hortxe erabakiko zen txapela zeinek eramango zuen.

Otaegik gogor ekin zion lanari, eta berehala hasi zen abantaila ateratzen, eta saioa amaitzerako, argi eta garbi zegoen garaipena zeinek eramango zuen. 7.05 izan zen bere denbora, eta 8.15, berriz, Rekondorena. Lan guztiak batuta, 11.25 izan zen Otaegik behar izan zuen denbora, eta 8.15, berriz, Rekondok behar izan zuena. Otaegi iaz bigarren izan zen, eta aurten, berriz, txapeldun.