Propagandatzat jo dute Itoizko urak Iruñerrira eramatea
IRUÑEA
Itoizko urak Iruñerrira eramateko gaur inauguratuko duten eraikuntza salatu zuten atzo Itoizko Solidarioek, eta ekitaldia «handikiro eta arranditsuki» egingo dutela kritikatu zuten, «Francoren sasoi onenetan bezalaxe».
Instalazioa «zentzugabekeria» dela adierazi zuten, «behar artifizialei» erantzuten dielako. «Iruñerriak ez du ur gehiagoren beharrik, orain arte murriztapenik izan ez delako eta azkenaldi honetan kontsumoa gutxi gorabehera egonkor mantendu delako», esan zuten. Alderdiko biztanle orok eraikuntzaren kostua, ur tarifaren igoeraren bitartez, bere gain hartu beharko dutela gaineratu zuen, eta guztira 1,2 milioi euro urteko ordaindu beharko dutela nabarmendu zuten.
Bestalde, «Itoizko urak Iruñera ekartzearen inguruan egiten ari den marketin politikoko operazio arrandiatsua» salatu zuten, urtegiak inguruan eragin duen «ohituren suntsiketa eta populazioaren deserriratzea» ezkutatzeko helburuarekin. Era berean, inaugurazioa unerik larrienean datorrela uste dute, «mazelen lerratzeak eta etengabeko lurrikarek sortutako arazoak» ere estaltzeko.
Urtegia berehala husteko eta «Nafarroako ekonomiaren porrota eraginen duten ubidearen lanak gelditzeko» eskatu zuten Itoizko Solidarioek.
|
