Seaskaren izenean, Euskararen Erakunde Publikoaren lehendakariak egin duen gutuna funtsezko puntuetan onetsi baizik ez dezaket egin eta azpimarratu nahi nituzke Seaska, Euskararen Erakunde Publikoa eta Hezkunde Ministeritzaren artean adosturiko puntuak :

­ Seaskaren eta Hezkunde Ministeritzaren arteko akordio baten izenpetzeko beharra, ikastoletako postuen kalkulatzeko tresna baten xutik emateko,

­ Euskararen Erakunde Publikoaren eta Seaskaren teknikarien kalitatezko lana akordio proposamen baten bultzatzeko,

­ Euskararen Erakunde Publikoaren eta Seaskaren arteko ikuspegi amankomun batera heltzea ardatz nagusiei dagokienez, erakunde horretako lehendakariak baikorki oroitarazten duena Seaskari igorri duen gutun irekian, hala nola hiru zatiz osaturiko dokumentuan: ikastolen pedagogi oinarriak Seaskaren hezkuntza arloko helburuekin uztartuz, postuen kondaketarako era batzuk finkatuz, bai eta ere akordioaren aplikapenerako arauak,

­ Errektoreak hartutako printzipiozko engaiamendua akordio horren izenpetzeko. Ministeritzarekin izenpetu lehen hitzarmena (hala nola elkartu kontratuen bidez ikastolentzat eskola estatutu lorpenarekin) eta hamabi urte berantago, honelako akordio batekin, bigarren aitzinatze nagusi bat litaike: helburu horien lortzeko postu eta pedagogi antolaketa mailan, ikastolen hizkuntza egitasmo eta doazkien ahalbideek ezagutza bat lor lezakete. Euskararen Erakunde Publikoaren lehendakariak azpimarratzen du elkarrekin aitzinatzeko zailtasuna akordio horren lortzeko eta konkretuki 2006-2007ko sartzearen antolaketa. Hor ere, onetsi baizik ez dezakegu egin, bainan zailtasun horiek zer diren zehaztea garrantzitsua iruditzen zaigu hala nola :

1­ Bere gutun irekian, lehendakariak azpimarratzen du, Seaskarentzat heldu den urterako hastapen batean, hezkunde ministeritzak aurtengo dotazioaren mantentzea aurreikusia zuela. Baitezpadakoa derizagu argitzea erabaki hori hartua izan dela Seaskak, gaur egungo dotazioa baino gehiagoko postu eskaera bat egina zuelarik, eta Seaskaren eta ikuskaritzaren arduradunen arteko konzertazio eskasean. Angeluko eta Hiriburuko ikastolen lehen mailen garapenak, bai eta ere Baigorriko ama ikastola berriaren irekitzeak Seaskaren beharren emendatzea adierazten dute; baita ere azken 3 urte hauetan Seas- kak lortutako postuak beti beharrak baino murritzagoak izaiteak. Ondorioz, hainbat ikastoletan pedagogi antolaketa mailako tirabirak sortzen dituen.

2­ Berriz ere Seaskak bere dotazioaren berri azken momentoan hartu du (maiatz erditsuan), bertze irakaskuntza eredu guzien ondotik. Eginmolde honek, negoziaketa eta konzertaziorako arras denbora gutti uzten du.

3­ Joan den maiatzaren 9an Seaska eta Ministeritzaren artean iragan elgarrizketa eta maiatzaren 16an Akademiako ikuskaritzarekin (ikuskari jauna gabe) ukan hitzordu baten ondotik dira bi postu gehigarri horiek lortu. Hor du Seaskak lehen aldikotz bere galdera zehaztu ahal izan eta bereziki bere antolaketa pedagogikoa, ikastolaz ikastola (jakin behar da postu eskaerak Ministeritzara abendu bukaerako helarazten direla). Elgarrizketa horretan Ikuskaritzako teknikariek ez dituzte nihundik ere Seaskak aurkeztutako argudioak zalantzan jarri. Beren lelo bakarra izan da banatzeko posturik ez zitzaiela gelditzen ; bakarrik Ministeritzak lezakeela gehiago proposa.

4­ Zonbeit egun berantago ikuskari jaunarekin ukan dei telefono baten bidez jakiten genuen bi postu gehigarri onesten zizkigutela.

5­ Solasaldi horretan, Ikuskari jaunari aipatzen genion lehen aldikotz, genituen lehen mailako zuzendari funtzioari lotu delegazio galderak (eskaera hori gutunez, Ministeritza, EEP eta Ikuskaritzako teknikariekiko elgarrizketen bidez jadanik aurkeztua izan zen). Gure zuzendariek ez dute, edozein ikastetxeren funtzionamendu on baten segurtatzeko baitezpadakoa den delegazio izpirik. Betebehar pizu horren segurtatzea, daukaten irakasle lanari zaie gehitzen. Ikuskari jaunarekiko elgarrizketan iduri zuen maila hortan negoziaketa idekia zela, jakinez aterabide bat aurkitzekotan zuzenean ikuskaritzaren bidez egingo zela eta ez Ministeritzaren postu banaketaren bidez. Ondoko egunetan, egoerak okerrera egin du, dirudienez, Ikuskaritza ez zen gehiago prest aterabide zehatz baten proposatzeko.

6­ EEPk Hezkunde Ministeritzari aurkeztu akordio proposamena irakaskuntza postuen kondaketarako hiru era ezberdinez osatua da : lehena Seaskak egina, bigarrena EEPko profesio- nalek Seaskako ordezkariekiko elgarrizketak aitzin landutakoa eta hirugarrena EEPko profesionalek Seaskako ordezkariekiko elgarrizketen ondotik landutakoa. Seaska, 2006-2007 ikasturterako luzatu postu eskaera izan dadin hiru metodo horietako edozeinekin koherentea da. Aldiz, Hezkunde Ministeritzak proposatu dotazioa, kondaketa metodo bakoitzak eman emaitzen azpian kokatzen da.

Hezkunde Ministeritza eta Seaskaren arteko harremanak zailak dira, Ministeritzaren erabakiak oso politikoak baitira (ber dotazioa, eman postu gehigarri kopurua), berez doan euskarazko irakaskuntzarako beharrekiko loturarik gabe ez eta ere menturazko akordio baten izpirituan. Oraingo jokamoldeek negoziaketara denbora gutti uzten dute.

Seaskarentzat negoziaketarako ateak ideki berriak zirelarik, Hezkunde Ministeritzak berehala hetsi dizkigu.

Seaska, ekainaren 27an Bordaleko Errektoretzan, Errektore Jauna, Ikuskari Jauna, eta EEPko buruzagiekin ukanen duen elgarrizketaren ondorioen zain dago, hala nola :

­ Oraino eskas diren 4 postu baita ere lehen mailako zuzendaritza delegazio orduei buruzko proposamen zeha-tzak egin ditzaten alde batetik,

­ Hezkunde Ministeritzak, Federazioa presio pean ezarri gabe, oinarri sendoekiko negoziaketa baten engaiatzeko xedea adierazten duen keinu bat egin dezan, beste aldetik. -