Herriko dirua «bere interesen alde erabiltzea» egotzi dio Iparrak EAJri
GETARIA
Getariako Iparra plataformak EAJk eta alderdiko alkate Josu Ezenarrok «herritarrena den dirua alderdiko interesen alde erabili» dutela salatu du. Plataformak kritikatu duenez, Meagas auzoan ur-horniketarako iaz egindako lanak legez kanpokoak dira, «lanak esleitzeko lehiaketa publikorik egin ez zelako, besteren artean».
Irregulartasunen berri ezustean izan zutela esan dute. Kalean kartel batzuk agertu ziren egoera salatuz, eta esan dutenez, ez ziren beraienak. Hala ere, kartel horien erantzule zirela aurpegiratu zieten Udalean. «Hori guztia ikusirik atzean zerbait bazela pentsatu eta Meagas auzoan egindako lanen gaineko informazioa batzen hasi ginen». Euren esanetan, eta eskuartean dituzten udaletxeko fakturak ikusita, Meagaseko lanak legez kanpokoak direla esateko moduan daude. «Lanak ez dira lehiaketa publikoaren bitartez esleitu eta hori beharrezkoa da 75.000 euroko lanen kasuan. Eurek hautatu dituzte obrak egiteko pertsonak», gaineratu dute. Beren esanetan, gainera, Udaleko idazkariak ere, fakturen ziurtagirietan lanaren esleipena «horretarako ezarritako lege bidea albo batera utzita» egin dela jakinarazten du.
Halaber, Udalean aurkeztutako fakturetako bat Iñaki Solozabal zinegotziarena dela ere kritikatu dute eta «hori legez kanpokoa» dela gogorarazi. Iparrak azaldu duenez, Udalak lanak auzolanean egin zirela erantzun zien eta zinegotzi horrek bere lana utzita jardun zuela argudiatu zuen dirua eman izana arrazoitzeko. Iparrak, baina, zera galdetzen du: «Auzolanak noiztik ordaintzen dira?».
Iparrak guztiaren atzean EAJk bere alderdiaren interesen alde egitea dago «zigorgabetasun osoa balu bezala». Era berean, indarrean dagoen apartheid politikoa baliatzen ari dela salatu dute Iparrako kideek.
|
