Lanuzteak SK2024 eta SK Epsilon enpresetan
GASTEIZ
SK2024 eta SK Epsilon enpresetako langileek 24 orduko lanuztea egingo dute ekainaren 29an. Enpresa horiek 200 langile dituzte eta SK10 enpresa ohiaren banaketaren ondorioz sortu ziren. Biak Alcor taldearenak dira. SK2024 enpresa Miñaoko parke teknologikoan dago; bestea, ordea, Gogaingo industrialdean.
Aeronautika sektoreko bi enpresa horietako langileek hitzarmen kolektiboko negoziazioa blokeatuta gelditu delako antolatuko dituzte mobilizazioak. Sei hilabetez elkarrizketak izan ostean, horiek bertan behera gelditu dira mementoz. Lan jardunaldian eta soldaten berrikuspenean sortu dira tirabirak.
Ekainaren 29ko lanuzteaz gain, beste ekimen batzuk egingo dituzte langileek. Gaur, esate baterako, elkarretaratzea egingo dute Alcor taldearen egoitzaren aurrean, hots, Zaramaga industrialdeko Deba eraikinaren aurrean. Hitzordua 11.30etik 12.00ak bitartean izango da.
Ostegunean, berriz, lanuztea egiteaz gain, bi elkarretaratzetara deitu dute. Lehenengoa Alcor taldearen egoitzaren aurrean izango da, 11.00etan. Bigarrena, Andra Mari Zuriaren plazan, 18.00etan.
|
