Aulestiko Udala, militarizazioaren aurka
AULESTI
Aulestiko Udalak osteguneko osoko bilkuran Jorratzen Partzuergoak duela aste batzuk Euskal Herriko udaletxe orotara bidalitako dekalogoa onartu zuen. «Jauzi kualitatibo garrantzitsua» delakoan, poza agertu zuen atzo Jorratzen-ek berak.
Prentsa oharrean, hartutako erabakiagatik Udala zoriondu zuen, eta urratsa ematen lehena izan dela eta aipatu dekalogoak barneratzen dituen neurriak udaletxe batek bere egiteak duen garrantzia nabarmendu zuen: «Era berean, oso garrantzitsu deritzogu epeka-epeka Euskal Herriko udaletxe guztiek halako jarrerak hartzen hasteari. Aulestiarrek aurrekari bat markatu dutela uste dugu», esan zuten.
Jorratzen-en xedea Euskal Herriko eragile politiko, instituzional, sozial, eta, bide batez, herritar orori militar eta polizia atzerritarrekin izan beharreko harremanetan zenbait neurri proposatzea zen. Finean, eguneroko bizitzan indar armatu horiekiko harremanetan euren desadostasuna agertzeko irizpide eta jarrera zehatzak eskaini nahi ditu, eta bide horretan lehen urratsa udalekin eman dute aipatu dekalogoa aurkeztuta.
Aulestiko Udalak proposatutako neurriak praktikan jartzea erabaki du. Eta, ondorioz, maniobra militarren aurrean, jazarpen polizial zein militarren aurrean edo herritarrek pairatzen dituzten hainbat bortxa eta gehiegikeriaren aurrean erantzuteko protokolo zehatz bat izango du eskuartean. Herrian hartutako neurrien berri ematen duten panel iraunkorrak jarriko ditu Udalak aulestiarren sentipena zein den gogorarazteko. Jorratzen-en ustez, «orain beste udaletxeen txanda da».
|
