- Zarautz Hiria Torneoko bigarren final-laurdena
Joko eta adore erakustaldia eman dute Leitzak eta Zearrak Zarautzen
·8-1 eta 14-6 galtzen joan ostean, bizkaitarrek ongi merezitako garaipena lortu dute
TITIN III - LASA III 21
LEITZA - ZEARRA
22
Pilotakadak: 686. Iraupena: 1.19.44. Benetako iraupena:
33.48. Markagailua: 4-0, 4-1, 8-1, 8-6, 14-6, 14-13, 15-13, 15-15, 16-15, 16-17,
17-17, 17-18, 18-18, 18-21, 21-21 eta 22-21. Sakez: 3 Titin III.ak eta 4
Leitzak. Airez: 11 Titin III.ak eta 3 Leitzak. Atzean: 1 Titin III.ak, 2 Leitzak
eta 2 Zearrak. Zabalean: 1 Titin III.ak, 1 Lasa III.ak eta 3 Leitzak. Moztuta: 1
Titin III.ak eta 1 Leitzak. Galdutakoak: 6 Titin III.ak (4 erasoan), 1 Lasa
III.ak, 2 Leitzak (1 erasoan) eta 2 Zearrak. Gertaerak: Sarrera ona Aritzbatalde
pilotalekuan.
DONOSTIA
Iñigo Leitzak eta Oier Zearrak lur jota utzi zituzten Zarauzko Aritzbatalde pilotalekura joan ziren apustulariak. 8-1 eta 14-6 galtzen joan ostean, ondo merezitako garaipena eskuratu zuten Titin eta Lasaren aurka. Horrenbestez, Asegarceko bizkai- tarrek Zarautz Hiria Torneoko bigarren finalerdia jokatuko dute datorren ostiral gauean Oinatz Bengoetxea eta Patxi Ruizen aurka.Eta garaipen horretan, Lemoako aurrelariak aipamen berezia merezi du. Aurkariek hala behartuta, normalean baino gehiago arriskatu zuen erasoan, baita ongi asmatu ere. 21nako berdinketa berak hautsi zuen ezker airez egindako tanto ikusgarri batekin, eta bere zenbakiek argi erakusten dute goi-mailako partida osatu zuela: 4 sake sartu zizkion Lasari, jokoan 9 tanto egin zituen eta 2 pilota baino ez zituen galdu. Zearrak ere, esan beharra dago, ezin hobeto lagundu zion atzeko koadroetan. Urdinak 16 eta 17koan ipini ziren lehen aldiz markagailuan aurretik, eta 17-18ko emaitzarekin ere dirua oraindik gorri zegoen. Katedra, ordea, urduri jartzen hasi zen Asegarcekoak 18 eta 21 jarri zirenean. Zearraren huts bakarrak eta Titinen bi tantok bigarrenean Leitza kexu azaldu zen traba egin ziotela esanez lehia 21na jarri zuten.
Piloten arabera
Baina partidaren lehen erdia ikusita, bazirudien gorriek airean lortuko zutela finalaurrekoan sartzeko txartela. Oier Zearra Titini pilota kendu ezinik ibili zen besteen pilotarekin eta Triciokoak ez zuen barkatzen. Ezker airez egindako bi tanto eder eta beste bi sakeri esker, 4-0 jarri zuten markagailua ikusleak oraindik behar bezala eseri gabe zeudenean.Erakustaldia ez zen hor gelditu, eta, Titinek txapara bidalitako pilotaren atzetik, beteranoen beste lau tanto etorri ziren segidan Oskar Lasa bera ere animatu zen zabalean dejadatxo bat botatzera, baita tanto bikaina egin ere. Partzial nabarmenez jositako lehen zati horretan, urdinak 8-6kora hurbildu ziren pilota aldatu ostean, baina Titinen berpizteak, ordea, berriz ere markagailua hautsi zuen. Errioxarrak aho zabalik utzi zituen ikusleak pilota bat argi-argi errebotera bidalita.
«Defentsa bikaina dute»
A.A.
DONOSTIA Oier Zearra oso pozik agertu zen partida amaieran lortutako garaipenarekin. «Guk piloteoan nahiko argi agindu dugu, baina Oskar eta Augustok sekulako defentsa dutela erakutsi dute. Partida osoan atzetik ibili eta gero, 18 eta 21 aurretik jarri gara eta garaipena eskuan geneukanean gauzak okertu egin zaizkigu. Nire akats bakarra orduan egin dut, baina zorionez azkenean irabazteko gai izan gara». Iñigo Leitza ere gustura zegoen, «maila horretako partida bat irabaztea eta ongi jokatzea oso garrantzitsua» delako beretzat. Azkenean, eskuan jasotako kolpeak ez zuen ondorio txarrik ekarri eta lemoarrak beste aukera bat izango du ostiralean.
|
