Bi kutxazain erre dituzte Gasteizen, ekintza berean
·Suhiltzaileen lana beharrezkoa izan zen botatako molotov koktelek eragindako sua itzaltzeko
GASTEIZ
Beste kale borroka ekintza bat izan zen atzo Gasteizen; bi kutxazain erre zituzten. Ekintza gauerdi aldera izan zen, eta, Barne Saileko iturriek jakinarazi zutenez, ezezagun batzuek Valladolid kaleko Vital Kutxa bankuko bi kutxazainen kontra hainbat molotov koktel bota zituzten. Suhiltzaileen lana beharrezkoa izan zen. Kalte handiak sorrarazi zituzten bi kutxazainetan.Aurrekoetan bezala, ekintza gaitzetsi zuen alderdi bakarra PP izan zen. Bestalse, EAEko idazkari nagusi Carmelo Barriok kezka agertu zuen «azken egunetan kaleko indarkeria ekintzak nagusitu baitira». Horrez gain, ezker abertzaleari «demokraten gainean presioa eta bortxa» egin izana leporatu zion Barriok. Bidalitako ohar batean, larunbatean Errenterian eta Barakaldon izandako kale borroka ekintzak gogora ekarri zituen, baita ostegunean Getxoko San Lorenzo azokan Maria San Gili errieta egin ziotela ere. Hortaz, «bortitzekin» tolerantzia ez izateko eskatu zien alderdiei eta instituzioei.
|
