- Kae
Lehen mailako ontziek Getarian dute hitzordua
DONOSTIA
Kantauriko Arraun Elkarteko (KAE) lehen multzoko hamabi traineruek hitzordu garrantzitsua dute gaur 12.00etan Getariako uretan. Lehiaketa bere unerik erabakigarrienera iritsi da, eta Getariakoaren ostean beste bi estropada baino ez dira falta izango lehen multzo horri amaiera emateko. Ondoren beste bi proba jokatuko dituzte, irailaren aurreneko asteburu bietan, eta bertan lehen multzoko ontziak eta bigarrenekoak izango dira aurrez aurre jaitsiera-igoera kanporaketetan.
Batzuen eta besteen nerbioak dantzan daude. Izan ere, asko dago jokoan denboraldia amaitzeko falta diren hiru estropadetan. Orain arte San Pedro izan da lehen multzoko talderik erregularrena, eta lidergoan da, 92 punturekin. Isuntza, 81 punturekin, bigarren postuan da. Lehiaketa horrela amaituko balitz,talde biek irailaren 16an edo 17an Galizian jokatzen den Ipar-mendebaldeko Ligako bi ontzi onenekin TKEra igotzeko kanporaketaurrea jokatuko lukete.
Dena dela, sailkapenean aldaketak izan daitezke. Izan ere, Getariak hamabi puntura du Isuntza, eta atzetik, Donostia Arraunek bihar bere arraun eskola aurkeztuko du eta Ondarroak ere badituzte beren aukerak.
Batzuen eta besteen arteko aldeak gaur bertan has daitezke aldatzen, Getarian. Santander, Santurtzi, Hondarribia eta Zierbena lehen txandan arituko dira, eta Camargo, Pontejos, Trintxerpe eta Ondarroa, berriz, bigarrenean. Ohorezkoan San Pedro, Isuntza, Getaria eta Donostia Arraun izango dira lehian.
|
