Abian dira nekazaritza langileen lan-baldintzak beste sektoreetakoekin berdintzeko neurriak
·EHNEk «printzipioz» positibotzat jo ditu neurriak, akordioa sinatzeko bera kontuan hartu ez arren
IRUÑEA
Nekazaritzan beste baten kontura lan egiten duten langileen langabezia babesaren sistema hobetzen duen Errege Dekretua indarrean da. Hain zuzen, «sektoreko langileek aspalditik eskatzen zituzten hobekuntzei erantzuten» dieten neurriak, EHNEko abokatu Begoña Okiñenak azaldu duenez.
EHNEko kidearen ustez neurriak «txarrak» ez badira ere, horiek hitzartzeko ez dituztela kontuan hartu salatu du: «Ez gaituzte deitu ez akordioa sinatzeko ezta gure iritzia jakiteko ere». Aurrerago, hala ere, akordioaren printzipioak garatzeko deituko dietela esan du Okiñenak. «Guri ere asko axola zaigu gai hori bai ekonomian, hau da, enpresaburuen edo lana ematen dutenen esfortzu handiagoa eskatu ahal duelako, gehienbat gizarte-segurantzari begiratuta. Bai eta esplotazioen bideragarritasunari begiratuta ere», azaldu du Okiñenak.
Nahiz eta EHNEk oraindik ez duen akordioaren xehetasun guztien berri, honakoa nabarmentzekoa iruditzen zaio: «Lehen, langile hauek eta kanpainetan lan egiten zutenek esplotazio hauek uzten zituztenean eta beste sektore batean lan egin nahi zutenean, Eraikuntzan edo Zerbitzuetan adibidez, nekazaritza-erroldetatik izena kentzen zieten, eta gero erroldan berriz sartzeko arazo asko izaten zituzten. Orain, aldiz, sartu eta irten nahi duten guztietan egin dezakete».
Alderdi positiboen artean bada besterik: «Langile hauek orain arte hiru hilabeteko langabezia jasotzen zuten urtebete lan eginda, baina orain lau hilabete jaso ahal izango dituzte, beste langile guztiek bezala», argitu du Okiñenak.
Hala, 15 urteko epea ezarri duLan Ministerio espainolak langile horien lan-baldintzak beste sektoreetakoekin berdintzeko. «Epe luzera hortaz, ikusiko dugu ze ondorio dakartzan honek», azaldu du.
|
