Irailaren 12an izanen da AHTren informazio bilera
BAIONA
Abiadura Handiko Trenari buruzko eztabaida publikoa atzo abiarazi zuten ofizialki. Baionako Marengo karrikan jarri duten bulegoak hilabete darama irekia eta laurehun bat lagunen bisita izan badu ere, atzo abiatu zuten lau hilabeteko eztabaida.
Lapurdiri dagokionez, lehen informazio bilera ondoko irailaren 12an eginen dute Baionako elkarteen etxean. «Eztabaida publikoa hainbat mailatan eginen dute. Alde batetik, RFF erakundeak kaleratu duen oinarrizko txostena informazio gisa ahal bezainbat etxetan banatu dute. Eta, zabaltze horrekin batera, hainbat bilkura antolatu dituzte», argitu zuten ekimenaren bultzatzaileek. Horiek horrela, mahai gainean jarriko dituzten gaien artean Abiadura Handiko bidea eraikitzearen beharra aipatuko zutela argitu zuten.
Horrekin batera, beste hamar bat bilkura publiko ere eginen dituzte Akitania eskualde osoan. Christian Maudet RFF erakundeko arduraduna bertan zegoela-eta, azken proiektua finkatzeko orduan eztabaidan erranak izan direnak kontuan hartuko zituztela nabarmendu zuen. «Oinarrizko txostenean hiru bide finkatu ditugu. Hala ere, horrek ez du erran nahi proiektua horretara mugatua dagoenik. Baliteke, geroan, laugarren aukera bat izatea», gehitu zuen.
«Eztabaida horretan aterako diren aholkuen arabera aztertuko dugu», esan zuen. 2007ko maiatzaren eta ekainaren artean RFFk azken proiektua kaleratu beharko luke.
|
