LABek irailaren 28ko greba deialdia egin du
BAIONA
LAB sindikatuak frantses agintariek irakaskuntzan egiten duten politika salatu du, eta ondoko irailaren 28an sindikatuek antolaturiko greba egunean parte hartzera deitu du. Izan eren, LABek bi salaketa nagusi egin zituen. Hezkuntza Ministerio frantsesaren erantzukizuna agerian jarri zuen egun euskararen irakaskuntzak dituen gabeziak nabarmentzerakoan.
Ikasgelak mantendu ahal izateko, urtero bezala, aurten izandako «tirabirak» aipatu zituen eta oraindik ere «hainbat huts» daudela adierazi zuen: Seaskak kontratuz kanpo bi lanpostu bere gain hartu behar izana, eredu publikoan lanpostu erdi batzuk ez erdietsi izana, eredu pribatuan lanpostuak frantses hutsezko ereduari eman izana. Egoera horiek kontuan harturik, Euskararen Erakunde Publikoan partaide den frantses Hezkundeari engaiatzeko eta euskararen aldeko «zinezko politika bideratzeko» eskatu zion LABek.
Euskarari dagokionez, sindikatuak Estatu frantsesean bezala, Lapurdin, Nafarroa Beherean eta Zuberoan ere, «2006ko ikasturtea hastean irakasteko lan baldintza kaskarrak» ikusi zituztela erran zuen.
«Lan murrizketak eragin ezin txarragoak sortzen ditu. Lan baldintzak kaskartzearekin, irakaskuntzaren alde errepresiboena eta kontserbadoreena areagotu egin da», argitu zuen, eta «eskola liberalari uko» egin behar zaiola nabarmendu zuen.
|
