BAIONA
Ipar Baionako auzoetan elkarrekin bizi diren kultura ezberdinen arteko ezagutza sustatzea eta aberastasun hori ezagutaraztea du helburu aurten laugarren urtea betetzen duen Baiona jaialdiak.
«Denak elgarrekin!» lelopean garatuko den Baiona jaialdiaren aurtengo edizioa pausoak ematen hasi da jadanik. Aurtengo leloa gaitzat hartuta, berrien eta argazkien txapelketa antolatu dute eta hilaren 30a izanen da lanak aurkezteko azken eguna. Idazkiak edozein hizkuntzatan aurkeztu ahal izanen dira eta txapelketak jaialdiaren espirituarekin bat egingo du.
Jaialdia berez igandean hasiko da Espiritu Santuaren auzoan, hitzordu nagusietakoa den Sukaldaritza Txapelketarekin. Oilaskoa edo ardikia munduko saltsekin prestatzea da xedea eta gero 20 pertsonarentzat prestatzen dituzten txapelketako plateretatik jateko aukera izanen da 8 euroan izanen den herri bazkarian. Haurrek dohainik jateko aukera izanen dute. Egun guztian animazioak izanen dira haur zein helduentzat. Arratsaldeko seietatik aurrera Lee Boni Moroniren kontzertua izanen da.
Urriaren 27 eta 28ko asteburuan izanen dira jaialdiko beste ekimen nagusiak. 27an, ostiralean, aurtengo berritasuna den animazio ibiltaria izanen da arratsaldeko hiruretatik zazpiak arte. Autobus batekin eta musikariak eramango dituen kamioi batekin Gurutze Santuaren auzoan eta San Etienne auzoan ibiliko da. Adineko jendearekin zein gazte elkarteekin hitzartutako geldialdiak eginen ditu autobusak zenbait tokitan aperitifa hartu eta zenbait ikusgarriz gozatu ahal izateko. Itzulia egin ondoren gaztetxoentzat beste hainbat ekitaldi eginen dituzte Francis James plazan eta bukatzeko, zinema emanaldi bat izanen da kanpoan.
Jaialdiari amaiera emango dion egun handian Hizkuntza eta Kulturen Jaia egingo dute Gurutze Santuko Jouandin etorbidean. Baionan hitz egiten diren 15 hizkuntza baino gehiago jai horretan ordezkatuko dituzte erakusketa, joko tradizional edo sukaldaritzako berezitasunen bitartez. Arratsaldeko lau eta erdietatik aurrera hainbat ekitaldi izanen dira musikan, dantzan, kantuan eta ikusgarrietan oinarrituta, betiere kultura ezberdinak ordezkatuz. Bostetan izango diren dantzetan, esaterako, ekialdeko dantzak, kreolak, gaskoiak eta nola ez euskaldunak aurkeztuko dituzte Baionako biztanleek eta elkarteetako kideek.
Arratsaldeko seiak eta laurdenetarako hizkuntz ikastaro erraldoi bat antolatu dute, eta bertan euskara, arabiera eta zeinu-mintzairaren oinarriak ikasi ahal izanen dira. Zortzi eta erdietatik aurrera Yassa, QNB eta Mix6Tren kontzertua izanen da.
Urriaren 6rako ere zinema-eztabaida gaua antolatu du jaialdiak Atalante zinema aretoan, eta bertan, “Aniztasunak Ipar Baionan” gaia jorratuko dute. Era berean, “Bayonne et les exilés de Juda” dokumentala eskainiko dute.
