BILBO
Astearte gauean Getxon eta Elorrion izandako erasoek kale borrokaren inguruko polemika areagotu zuten atzo. Azken hori Iñaki de Juanak eta gainerako euskal preso politikoek jasaten duten eskubide bortxaketaren aurkako erantzuntzat jo zuen ekintzaile batek, GARAri helarazitako mezuan. Eta espetxe politika eta kale borroka era garbian lotu zituen Miren Azkarate Lakuako eledunak, Donostian egindako adierazpenetan.Arlo politikoan dagoen «paralisia» eta presoen egoera aipatu ondoren, bakea bilatzeko ez direla lagungarriak adierazi zuen Azkaratek. Baina kale borrokak ere ez duela laguntzen erantsi zuen.
«Egia da paralisiak ez duela inolako ekarpenik egiten bakea lortzeko bidean, eta egia da presoen eskubideak ez betetzeak ere ez duela ezer ekartzen. Baina etengabeko indarkeriak zer ekartzen du? Ezer positiborik ez», ziurtatu zuen.
Getxon autobus bat erretzen saiatu ziren lau ekintzaile;ustez, erregaia isuri zuten barruan, baina su eman aurretik ertzainak agertu eta ihes egin zuten. Elorrion, berriz, suzko barrikadak jarri zituztela zabaldu zuten, baina ekintza bere gain hartu zuen pertsonak Posta bulegoari ere eraso zitzaiola gaineratu zuen.
Ohi bezala, PPk eta PSOEk Batasunari deitu zioten, honelako ekintzak gaitzets ditzan. EAJk ere adierazpen bat kaleratu zuen, eta sabotaje horiek «atzera egitea» adierazten dutela eta Anoetan ezker abertzaleak hartutako konpromisoen aurka doazela esan zuen.
EBren ustez, ezker abertzaleak «pedagogi lana egin behar du». EAren esanetan, «demokraziaren aurka eta normalizazioarekin bateraezinak» dira ekintzok. Eta Aralarren ustez, «inoiz baino zentzuga- beagoak eta antzuagoak dira».
