BAIONA

Biarritzek garaipena eskuratzeko moduko zelaia izango du gaur, Montauban ez baitabil punta-puntan. Sailkapenean bederatzigarren daude, nahiz eta aurten Liga oso parekatua izaten ari den. Stade Français da orain arte besteen gainetik dagoen taldea, eta Aviron besteen azpitik dagoena, bestela, denak parean dabiltza.

Azkeneko jardunaldian, lapurtarrek 20-6 menderatu zuten Agen, eta Montaubanek, aldiz, 13-9 galdu zuen Agenen zelaian. Gaur Montauban ahaleginduko da Ligako azkeneko bi urtetako txapelduna mendean hartzen, izan ere, talde guztiek hartu nahi izaten dute azpian txapelduna.

Biarritz, berriz, ez da askok espero zuten jokoa egiten ari, baina urtero asko kostatzen zaio maila hartzea. Dena dela, orain arte egindakoa nahikoa izanda lapurtarrentzat sailkapeneko bigarren postuan jartzeko. Egia da lehen sailkatuak Stade Françaisek hamar puntu kentzen dizkiola, baina Liga oraindik luzea da, eta, gainera, helburua estreinako lautan geratzea izango da, horiek jokatzen baitute Ligako azkeneko fasea.

Biarritzek jokatu dituen zazpi partidetatik bost irabazi ditu eta bi besterik ez ditu galdu. 157 puntu lortu ditu, eta 95 jaso. Puntu gehigarriak, berriz, bi besterik ez ditu egin. Montaubanek, aldiz, jokatu dituen zazpi partidetatik hiru irabazi ditu, eta lau galdu. 149 puntu sartu ditu, eta 95 jaso. Hiru puntu gehigarri ere lortu ditu, eta arlo horretan Biarritzi irabazi egiten dio.

Jokalariei dagokienean, Biarritz zalantza askorekin agertzen da gaurko norgehiagokarako. Thion, Betsen eta August berriro ere hamabostekora itzuliko dira, eta azken orduko ezusterik ez baldin bada, gaur hasieratik arituko dira Montaubanen zelaian. Dupuy Tillous-Bordes eta Brusque, berriz, ez dira arituko. Kolpatuta daude, eta ez daude gaur jokatzeko moduan. Yachvili, Harinordoki eta Lievremont, berriz, zalantza dira gaur ilunabarrerako. Hirurek ere min hartuta amaitu zuten larunbatean, eta denak izatea ia ezinezkoa izango da. Yachvili aritzea, behintzat nahiko zaila ikusten zen atzo.