Su-etena iragarri du PKK-k Ocalanen mezuaren ostean
·Ankarako Gobernuaren erantzunaren araberakoa izango da neurriaren iraupena
PKK-k bere indarrei dei egin die, gaurtik aurrera, behar logistikoak izan ezik, operazio militar guztiak bertan behera uzteko. Su-etenaren iraupena Ankarako Gobernuaren esku utzi du, «kurduen auzia konponduko duen prozesu demokratikoa abian jartzea» baita neurri horren asmoa.
ANKARA
Kurdistango Langileen Alderdiak (PKK) su-etena iragarri du Firat News prentsa agentziaren bitartez.Su-etena gaur sartuko da indarrean, eta Turkiako Estatuko Indar Armatuei ez erasotzeko konpromisoa hartu du gerrillak, betiere kurduen matxinada suntsitzeko Turkiako Armadak erasorik egiten ez duen bitartean. Neurriaren epeari dagokionez, su-etenaren iraupena emango diren aurrerapausoen eta egoeraren bilakaeraren araberakoa izango dela azaldu du PKK-k Kandil mendietatik, Iraken barruan dagoen Hego Kurdistandik kaleratu duen adierazpenean. Izan ere, «kurduen auzia konponduko duen prozesu demokratikoa abian jartzeko esperantzarekin» iragarri du gerrillak su-etena.
Ankararen erantzuna
PKK-k Abdulah Ocalan bere buruzagiak espetxetik egin zuen eskaera onartu du. Ankarako Gobernuak, ostera, ez du inolako asmorik agertu «erakunde terrorista» batekin su-etena sinatzeko.
|
