- Top 14
Aviron berriro ere azkeneko postuan dago
NARBONNA 25
AVIRON 12
BAIONA
Avironek aukera ederra zuen atzo jaitsierako postutik irteteko, baina azkenean galdu egin zuen kontrario zuzen baten aurka. Berriro ere sailkapeneko azkeneko postuan dago, Brive atzetik zuenak irabazi egin baitzuen. Avironek orain lehen baino urrunago dauka mailari eusteko aukera.Partida ez zen gaizki hasi euskaldunentzat, lehen minutuan zigor bati esker Pezek aurretik jarri baitzituen euskaldunak. Gero, hamar minutuan, etxekoek beste bi jaurtiketei esker partidari buelta eman zioten, eta 6-3 aurreratu ziren. Oren laurdena betetzen zenean, Pez argentinarrak drop-a egin zuen, eta berriro ere markagailuan berdinketa izan zen. Hortik aitzinera, ordea, etxeko taldeak hartu zuen partidaren jabetza, eta atsedenera joan aurretik transformatutako entsegu bat eta zigor-kolpe bat lortu zituen; 16-6koarekin joan zen atseden hartzera. Bigarren zatian, euskaldunak ahalegindu egin ziren. Etxeko taldea adina izan zen Aviron, baina lehen zatian etxeko taldeak ireki zuen zuloa gainditzea ezinezkoa egin zitzaion talde zuri-urdinari. Berriro ere esku hutsik itzuli zen, eta zerbait gehiago egin zezaketen errezeloarekin. Garbi dago egoera zaila dela, eta beste emaitzak ere ez ziren Avironen lagungarri izan. Orain, lanean jarraitu beharra dauka, eta etxean puntu gehiagori ihes egiten ezin die utzi, bestela, oso zaila izango baitu Baionako taldeak sailkapeneko atzealde horretatik irteten hastea.
|
