 |
|
|
|
|
Sri Lankako ehunen bat soldadu hil dituzte tamilek eraso suizida batean
Sri Lankako Itsas Armadako konboi baten aurka lehergailuz betetako kamioi bat zartarazi dute Digampathanan, Indikoko uhartearen iparraldean. Sri Lankako militarrek jakinarazi dutenez, gutxienez 98 marine hil eta beste 150 zauritu dira. Uste da LTTE tamil tigreen gerrillako kamikaze batek leherrarazi duela bonba-kamioia. Horrela izango balitz, LTTEkoek azken hogei urteotan egin duten eraso suizidarik larriena litzateke. Gatazkak aurten gutxienez 2.000 pertsona hil ditu.
 |
KOLONBO
Nazioarteko agentziek egin dituzten kalkuluen arabera, Digampathanako eraso suizida LTTEko gerrillariek 1987az geroztik egin duten larriena da. Itsas Armadako konboia hamabost autobusez osatuta zegoen eta horietako hamahiru kaltetu edo suntsitu zituen leherketa ikaragarriak. Ibilgailuetan 300en bat militar zihoazen Trincomalee hiriko basera, uharte osoko itsas baserik handienera, Prasad Samarasinghe jeneralak emandako bertsioaren arabera.Mahinda Rajapakse Sri Lankako presidenteak argi dauka erasoa tamilek egindakoa dela. Agiri baten bitartez adierazi duenez, «bere helburuak indarkeriaren bitartez lortzeko LTTEren asmoa agerian uzten du» erasoak. Baita nazioarteko agenteek indarkeria uzteko egin duten eskariei kasurik ez egiteko erabakia ere, presidentearen iritziz. Erasoak eraso, bake prozesuak aurrera jarraitzen du. Atzo elkartu zen Kolonbon Gobernuko ordezkariekin Yasushi Akashi bitartekari japoniarra. Hilaren 28an elkartzekoak dira Suitzan bi aldeetako ordezkariak. Gaur Norvegiako bitartekari bat iritsiko da Sri Lankara elkarrizketa horiek prestatzera. Bestalde, atzo bertan Sri Lankako Epaitegi Gorenak tamilen aurkako erabakia hartu zuen: iparraldea bi puskatan zatitzea.
|
|
|
|
|
|
|  |
|
|
|
|
|
