Prozesua babestea gizartearen esku dagoela esan dute EHNEk eta ELBk
BAIONA
Lurramaren gunea baliatu zuten atzo ELB eta EHNE sindikatuek gatazka politikoaren konponbide prozesuari buruzko adierazpenak egiteko. Laborarien sindikatuon esanetan, gatazka gainditzeko «gizarteak eta haren eragileek zuzenean parte hartzea» ezinbestekoa da. Konponketarako, «eratzeke dagoen alderdien gunea ezinbestekotzat» jo, eta prozesua bera «sustraitzea eta babestea gizartearen esku» dagoela nabarmendu zuten. Bi estatuek pausorik eman ez izana deitoratu zuten sindikatuek, eta «interes partidistak alboratzeko» eskatu zieten alderdiei. Eragile nagusiak izanik ere, konponbidearen ardura ez dela soilik haiena azaldu zuten. Gizarte eta sindikatu eragileek prozesu politikoan zer esana badutela aitortu zuten. Prozesu «irekia eta bazterketarik gabekoa» izan behar duela esan zuten, «akordioa euskal herritarren erabakitzeko eskubidea onartzetik» bideratu behar dela esan aitzin.
|
