«Errepide mapa» eskatu dute Muxikarako
·Industrialdearen plangintza geldiaraztea eskatu dute hainbat sindikatu eta taldek
Muxikan egin nahi duten industrialderako «errepide mapa» bat hitzartzeko eskatu dute eskualdeko sindikatuek, talde ekologistek, Batasunak eta Gai herri-plataformak. Atzo egindako agerraldian, proiektuaren nondik norakoen berri eman eta prozedura gelditzeko eskatu zuten.
GERNIKA
EHNE, ELA, LAB, Gernika-Lumoko Batasuna, Gernika-Lumoko Gai herri plataforma, Ekologi Tailerra eta Erlezainak prentsaren aurrean izan ziren atzo, eta Muxikan eraiki nahi duten industrialdea izan zuten mintzagai. 2004. urtean Sabin Intxaurraga sailburuari eta geroago, Esther Larrañagari bidalitako eta erantzun gabeko gutunak aipatu zituzten eta era berean, Sprilur-ek ere ez duela erantzunik eman salatu zuten.
Ondoren, proiektua aurrera zihoanez, 2005. urtean aurkeztutako alegazioak aipatu zituzten, baita 2006an Muxikako Udalbatzak onartutako Arau Subsidiarioen aldaketa ere. Azken unean aurkeztutako alegazioez gain, «lehenengo eta behin iaz egindako alegazioak berresten» dituztela nabarmendu zuten atzo.
Bizkaiko Foru Aldundiko Ingurumen Zuzendaritzaren «akats larri batzuk» aipatu eta gero, EAJ eta EA kritikatu zituzten. «Badirudi EAJrentzat eta EArentzat garapen iraunkorraz eta, ondorioz, parte-hartze demokratikoaz auzolana hitz egitea zeruko musika dela, Rio 1992ko edota Aalborgeko gutuneko zeruko musika. Hala ere, eurekin ez duela zerikusirik dirudi, dokumentu biak sinatuta dituzten arren», esan zuten.
|
