- Izotz hockeya
Hormadi gero eta okerrago ari da
DONOSTIA
Hormadi Angelukoak aurrera jarraitzen du bere denboraldi negargarriarekin, eta larunbat gauean astindu ederra hartu zuen berriro, 8-2 galdu baitzuen Morzinen izotz jauregian, eta sailkapeneko azkeneko postura erori da.Hormadik partida eskasa egin zuen berriro ere, eta ez zuen aukerarik izan garaipena edo zerbait lortu ahal izateko. Norgehiagoka lehen zatian erabaki zela esan daiteke, gorri-berdeek erraztasun guztiak eman baitzizkien aurkariei eta hamar minututan bost gol egin zituzten. Partida, beraz, ia erabakita geratu zen, nahiz eta artean asko falta zen jokatzeko. Bigarren zatian etxekoak lasai atera ziren. Norgehiagoka alde zuten, eta presarik gabe aritu ziren, Hormadik ere ez baitzituen askorik estutzen, baina bigarren zatiaren erdialdera seigarren gola egin zuten, eta lehendik zuten aldea handitu zuten. Bigarren atsedena hartu aurretik, Bellierrek euskaldunen lehen gola egin zuen, eta 6-1ekoarekin joan ziren bigarren atsedena hartzera. Azkeneko zatia ere aurrekoaren tankerakoa izan zen. Hormadik apur bat hobetu nahi zuen itxura, eta bigarren gola lortu zuen Daramiri esker, baina etxekoek beste bi gol lortuz erantzun zuten.
Superliga
Superligan, emaitza bestelakoa izan zen, Txuri urdinek 10-0 irabazi baitzion Majadahondari. Gipuzkoarrak 2-0 aurreratu ziren lehen zatian, eta bigarren eta hirugarren zatietan launa gol egin zituzten. Etxeberria nabarmendu zen besteen gainetik, lau gol egin baitzituen berak bakarrik. Lehen fasea amaitzeko partida bakarra geratzen da.
|
