- Areto Futbola
Hegoaldek gero eta atzerago ditu atzeko postuak
DONOSTIA
Garrantzi handiko garaipena lortu zuen larunbat arratsaldean Hegoaldek eta, beraz, gero eta atzerago ditu emakumezkoen Ohorezko Mailako atzeko postuak.Urdinek 4-3 hartu zuten mendean Gironella talde katalana. Partida zaila zuten, bisitariek jadanik lortuta baitzuten Kopa jokatzeko txartela, baina, sailkapenaren goialdera hurbiltzen joateko asmoarekin etorri ziren Tolosara. Partida ona izan zen, eta bi taldeek izan zituzten aukerak, baina gipuzkoarrak hobeto ibili ziren eta amaieran primeran datorkien garaipena eskuratu ahal izan zuten.
Mutilak
Ohorezko B Mailan, mutiletan, denetako emaitzak lortu dituzte maila horretan dabiltzan hiru euskal ordezkariek.GSI Bilbok sailkapeneko bigarren postuan jarraitzen du, eta oraingoz igoera fasea jokatzeko postuetan dago. Zuri-gorriek Casanovaren kiroldegian jokatu eta 3-4 irabazi zuten neurketa estu baten ostean. Alaves, berriz, ez jaisteko borrokan dabil, baina jokalariek ezin izan zituzten hiru puntuak batu, 4 eta 4 berdindu baitzuten etxean Sicoris taldearen aurka. Perfiles Sintal Lizarrakoak izan zuen emaitzarik kaskarrena, galdu egin baitzuten Castro Urdialesen 3 eta 2.
|
