Piter Bravo izango da TKEko presidentea aurten ere
DONOSTIA
Traineru Kluben Elkarteak (TKE) iazko Zuzendaritza Batzordeak urtebete gehiago bere postuan jarraitzea erabaki zuen atzo Oiartzunen egindako batzar nagusi bikoitzean. Hala, Piter Bravo kantabriarra izango da aurtengo denboraldian ere TKEko presidentea. Berarekin batera, Javier Sorozabalek (Arkote), Luis Unanuek (Zumaia) eta Juan Ramon Outedak (Mecos) osatuko dute Zuzendaritza.
Erabaki horrez gain, TKEko elkarteek iazko kontuak (400.000 euro) onartu zituzten Pasai Donibaneren kontrako bozarekin, eta 2007ko aurrekontua ere (350.000 euro) ontzat eman zuten Caboren aurkako bozarekin eta Pedreñaren abstentzioarekin. Gainera, talde bakoitzak 25.000 euroko bermea jarri beharko du maiatzaren 1a baino lehen, eta irailaren 30ean itzuliko diete zigorrik jaso ez duten taldeei.
Batzarrak San Pedro onartu zuen bazkide berri moduan, eta Pasai Donibanek postua utzi zuen. TKEk Euskadiko Federazioarekin ere hitzarmena sinatu zuen epaile-lanak egiteko.
|
