GASTEIZ
Ikasle mugimenduak Gasteizko EHUko campusean prentsaurrekoa eman zuen atzo, joan den martxoaren 9ko greba eta mobilizazio egunean bertako zaindariek izan zuten «jarrera bortitza» salatze aldera. Agertu zuenez, lehen ere oso kontrolatuta dauden fakultateek «espetxe itxura» hartu zuten egun horretan. Fakultateko ate guztiak itxi eta bakoitzean segurtasunerako zaindari bat jarri zutela agertu zuten. Ondorioz, fakultatera sartu nahi zuten guztiak izen-abizenak ematera derrigortu zituzten. Gainera, «ikasleen kontrola areagotzeko» beste hainbat neurri hartu zituztela gaineratu zuten. «Lehendik ere EHUko fakultateak kameraz josita dauden arren, egun horretarako espresuki segurtasunerako langile gehiago ekarri zituzten», agertu zuten.
Zaindari horien jarrera ere kritikatu zuen ikasle mugimenduak: «Egun guztian iraindu gintuzten, beren harropuzkeria, probokazio, mehatxu eta errepresioarekin». Horren adibideak ere eman zituzten. Esaterako, agertu zutenez, Magisteritzako fakultatean ikasle talde bati sakelako telefonoarekin argazkiak ateratzen saiatu ziren segurtasun zaindariak, eta hori «legez kanpoko praktika» dela salatu zuen.
«Beste ikasle bat lepotik heldu eta mehatxatu egin zuten. Segurtasuneko beste kide bat kate bat eskuan zuela ibili zen harro-harro ikasleak iraintzen. Azkenik, beste batek komuneraino jarraitu zion ikasle bati, beraz fidatzen ez zela esanez», azaldu zuten jarrera erasokor horren adibide modura.
Ertzaintza ere egun guztian barna campus inguruan ibili zela salatu zuen ikasle mugimenduak, eta erabat larritzat jo zuen «ideia berrien eta sormen kritikoaren esparrua» izan beharko lukeen unibertsitatean adierazpen askatasuna «hain bortizki eta inpunitate osoz» zapaldu izana.
