GASTEIZ

Ezker Abertzalea taldeak atzo jakinarazi zuen ELA, ESK eta EILAS sindikatuek aurkeztu eta Gasteizko Legebiltzarrean atzera bota zuten ekimen legegilearen aldeko helegitea aurkeztuko duela, bere esanetan, «gizarte eredu berri baten aldeko» proposamena arrazoi «guztiz politikoengatik» baztertu dutelako.

Sindikatuek etxebizitzan, osasunean eta irakaskuntzan aldaketak proposatzen zituztela gogorarazi du Ezker Abertzaleak adierazpen batean, eta baztertzeko erabilitako argudioa, ekimen legegileak onartzeko araudia bete ez dutelakoa, aitzakia bat besterik ez dela salatu du. Izan ere, gaineratu dutenez, zerbitzu juridikoak onartzearen aurkako iritziak eman arren, zenbait ekimen legegile onartu baitituzte; «herri pobreetan elkartasuna eta justizia bermatzeko karta», esate baterako.