Manifestazioa Donostian erraustearen gaineko herri-galdeketa bideratzeko
Errausketaren Aurkako Plataformak eta EHNE sindikatuak manifestaziora deitu dute larunbat honetarako, «inposatu nahi duten hondakinak errausteko sistema» baztertu eta erakundeei herri-galdeketa zabala egin dezatela exijitzeko. Ekimenaren bidez, gizartea, agertu duen bezala, errausketaren aurkakoa dela islatu nahi dute eta hainbat talde ekologista, sindikatu eta alderdi politiko batu dira deialdira. Manifestazioa 18.00etan abiatuko da Bulebarretik.
DONOSTIA
Errausketaren Aurkako Plataformak eta EHNE sindikatuak antolatu dute larunbatean Donostian izango den errauste-sistemaren kontrako manifestazioa, eta, Plataformako bozera- maile eta Arnasako kide Mikel Izagirrek azaldu zuenez, lau zutabe nagusi nabarmendu nahi dituzte ekimenaren bidez.Batetik, hondakinak tratatzeko sistema egokiagoak, merkeagoak, osasungarriagoak, ingurumena gehiago errespetatzen dutenak eta isurketa edo igorpen arriskutsurik gabeak badaudela nabarmendu zuten eta, beraz, erraustea «inposatzea» ez dutela inondik inora onartuko ziurtatu zuen. Horiek hala, «ingurumen arloko gaietan jarrera nahasia agertzen duten alderdiak» salatu eta herritarrek informazioa jasotzeko eskubidea dutela gogorarazi zuen. Herritarrek erraustearen sistema baztertzen dutela plazaratu dute orain arte egin dituzten galdeketek, eta, Izagirrek jakinarazi zuenez, manifestazioaren helburuetariko bat gizartearen isla izatea da. Alde horretatik, hainbat talde ekologista Eguzki, Ekologistak Martxan, Greenpeace eta Haritzalde, alderdi politiko Aralar, Ezker Batua, Batasuna eta Zutik eta sindikatu ELA, LAB, CCOO, ESK eta EILAS batu dira ekimenera. Azkenik, herritarrei eragiten dieten gaietan erabakitzeko aukera izan behar dutela adierazi zuen eta, beraz, larunbatean herri-galdeketa egiteko eskaera egingo dutela azaldu zuen.
Zabortegiak kaltetuak, bertan
Azken baieztapena falta zen arren, San Markoseko zabortegiak kaltetutako bizilagunak ere «manifestazioko lehen lerroan» egongo direla adierazi zuen Izagirrek. Zabortegia aurten itxi arren, eragin kaltegarriek urteetan iraungo dutela nabarmendu zuen.
|
