Positibotzat jo dute Administrazioko lanuztea
IRUÑEA
ELAk eta LABek deituta Araba, Bizkaia eta Gipuzkoako Administrazio Orokorreko langile funtzionario finkoek eta bitartekoek bi orduko lanuzteak egin zituzten atzo. Aipatu sindikatuek nabarmendu zuten «deialdiak erantzun zabala eta positiboa» izan zuela, eta martxoaren 30ean egin lanuztean bezala,langileek «Administrazioa erakusten ari den jarrera inposatzailea» arbuiatu zutela gaineratu.
Era berean, Administrazioak, besteren artean, «lanpostuen berrantolaketa eta balorazio berri bat inposatu» nahi duela agertu zuten, «langile gehienen iritziaren aurka». Hori guztia dela-eta ELAk eta LABek, UGTrekin batera, Legebiltzarreko talde guztiekin hitz egingo dute datorren astetik aurrera, «egoeraren larritasunaren berri emateko eta Eusko Jaurlaritzan ahal duten neurrian eragin dezatela eskatzeko».
Nafarroako Administrazio Publikoetako Mahai Orokorreko negoziazioari dagokionez, bestalde, ELAk «akzio sindikaleko neurriak» hartu behar direla uste du. Izan ere, Sanzen Gobernuak egindako azken proposamenak ez dituela benetako arazoak jorratzen esan zuen sindikatuak. «Hau da, prekarietatea, behin-behinekotasuna, diskriminazioa eta soldaten parekatzea», azaldu zuen ELA Gizalaneko Virginia Jimenezek.
Horrela, Jimenezek negoziazioa «zerotik hasi» behar dela esan zuen, eta benetako arazoak tratatu, «ez soilik ordainsari aldagarria izeneko kontzeptua». «Gure ustez, gainera, egokiagoa litzateke sektore-mahaietan hitz egitea mahai orokorrean baino», gaineratu zuen.
|
