Urtero bezala, Bermeoko XII. Arrain Azoka hasi zen atzo goizean. Aurten, 31 enpresa erakusle daude, eta eskaintzen dituzten produktuen artean, hegaluzea, bakailaoa eta antxoak daude. Bihar arte egongo da feriara joateko aukera, eta, gainera, goiz eta arratsaldez egongo da irekita. Bertan, arrantzari lotutako hainbat ekintza ikusteko aukera dago, eta horrez gain, kontserba-potoetan itsasoko janari gozoak topa daitezke. Hala ere, marisko freskoa erosteko aukera ere badago, hala nola, nekorak edota zigalak.

Azoka atzo goizean hasi zen ofizialki, eta ohorezko aurreskua eta guzti izan zen. Fanfarreak ohiko abestiekin alaitu zituen kostaldeko herriko kaleak, eta herritarrak laster sartu ziren festa giroan. Postuak Lamera parkean daude; Bermeoko portu historikoaren aldamenean, hain zuzen ere. Eguerdi aldean, azokagunea jendez gainezka zegoen. Lan-eguna izanda, gehienak bermeotarrak edo inguruko herrietakoak ziren baina, hala eta guztiz ere, adin guztietako jendea topa zitekeen. Izan ere, azokagunean haurrei jolasteko aukera ematen dien txoko bat topa daiteke, eta bertako begiraleek, pirata jantzita, txikiak hartzen dituzte. Gainera, Eleizalde ikastolak haur eta gateentzako beste gune bat prestatu du; bertan, arrantza edo itsas kirolak gaitzat dituzten bideo-jokoekin jolas daiteke.

Azokako postuak begiratzen ari zen bikote batek GARAri honakoa aitortu zion: «Ferialekuko gauzarik onena eskaintzen dituzten pintxoak dira». Bakailaoa pil-pil eran, kabratxo budina edota karramarro entsalada izan ziren, besteren artean, atzo dastatu ahal izan zirenetariko batzuk.

Geurien be bai