- Euskal Bizikleta 2006
Bere txikian handi izaten segitu nahi du Eibarko probak
·Julian Erasok dei garbia egin zien Pro Tour taldeei dagokien erantzukizuna hartzeko
DONOSTIA Hamazazpi taldek Pro Tourreko Euskaltel, Liberty, Saunier eta Illes Balears barne ekingo diote datorren asteazkenetik aurrera bost etapa eta 793 kilometro izango dituen Euskal Bizikletaren beste ekitaldi bati. Arrigorriaga, Ispaster, Gatzaga, Agurain bi sektoretan banatuta eta, nola ez, Arrate, azken hori berriz ere goizez, izango dira aurtengo etapa amaierak.Antolatzaileei ez zaie ahaztu iaz gertatutakoa. Pro Tourraren sorrera urtean arazo ugari izan zuten talde indartsuak Eibar aldera ekartzeko, eta ustez goi-mailako beharko luketen haiek ez ziren lasterketan gehiegi busti. Hori gogoan, Julian Erasok aurkezpen ekitaldian Miguel Madariagarekin aurrez hitz egin duela onartu zuen eta Euskalteleko managerrak Haimar Zubeldiarekin «proba irabaztera» irteteko borondatea azaldu omen dio. Ibilbideari dagokionez, Aguraingo 21 kilometroko erlojupekoak eta Arrateko azken etapak erabaki beharko lukete sailkapen nagusia, nahiz eta ostiraleko etapa ere Untzilla eta Gatzaga bi aldiz igo beharko dituzte azken 40 kilometroetan arriskutsua izan daitekeen mendian oso ongi moldatzen ez diren txirrindularientzat. Probak 200.000 euroko aurrekontua du eta saritan 71.300 banatuko ditu, UCIk eskatzen duen gutxienekoa. Kaikuk Palomaresek bigarren egin zuen iaz eta Orbeak ere etxean korritzeko aukera izango dute kanpoko beste taldeen artean: 3 Molinos Resort, 3C Androni, Acqua, Agritubel, Andalucia, Barloworld, C.Valenciana, LPR, Nicolas Mateos, Relax eta Spiuk. 136 txirrindulari guztira; iaz Eladio Jimenezek jantzi zuen txapelaren bila. Txomin Perurena omenduko dute Arrateko gainean
Euskal Bizikletak omenaldi berezia egingo dio Txomin Perurena txirrindulari ohi handiari Arrateko helmugan. Aurkezpenean oroitarazi bezala, Perurenak behin baino gehiagotan jaso ditu besoak Eibarren, eta haren ibilbide oparoa saritu nahi dute. Txomin ezin izan zen aurkezpenean egon. -
|
