- Arrauna
Pedreña ez doa Espainiako bi txapelketetara
·Fermin Iraola epailea tartean bada, Kontxako Banderari ere uko egingo dio
DONOSTIA
Pedreñak ez du Espainiako Trainerilla Txapelketan parte hartuko Fermin Iraolak lehiaketako epaile izaten jarraitzen badu. Iraola, iaz Kontxako aferan parte hartu zuen epaile euskalduna, Espainiako Federazioak bere epaile izendatu zuen orain dela pare bat aste, eta, beraz, Vigoko Espainiako Trainerilla Txapelketan eta Santanderreko Traineru Txapelketan epaileetako bat izango da.Pedreñako ordezkariek igandean jokatutako Kantabriako Trainerilla Txapelketa baliatu zuten bertaratu ziren ikusleei ohartxo bat banatzeko, eta han aipatzen zen Fermin Iraola tartean bada, ez direla joango ez Vigora, ez Santanderrera, ez eta Kontxako Estropadara. Haien ustez, ezin da hainbeste lan egiten duten kirolari batzuen emaitza «horren gaitasun eskaseko pertsona baten eskuetan utzi» eta ez dute ulertzen Espainiako Federazioak «ezikusiarena egitea Pedreñari eta Kantabriari horrenbeste kalte» egin dien gertakari batean. Gaiaz galdetuta, Joseba Fernandez Pedreñako prestatzaile eta arraunlari pasaitarrak aurrez azaldutako jarrerari gogor eutsi zion Euskadi Irratiko “Tostartean” saioan. «Fermin Iraolak sekulako hankasartzea egin zuen iaz Kontxan, eta ez da lehena. Guk ezin dugu neguan eginiko lan guztia horrelako pertsona baten eskuetan utzi eta horretarako nahiago dugu ez joan», esan zuen sanjoandarrak. Izango dituzten presioen gainean, Fernandezek ez zuen ezer garbirik esan, baina presioak presio, erabakiari eusteko nahia azaldu zuen.
|
