DONOSTIA

Plataformak agertu duenez, behin alegazioak aurkezteko epea amaituta ­kasik 700 herritarrek eta Bildu Hernanik berak aurkeztu zituzten­ «prozedura normala jarraitzen ari dela irudikatu nahi du; alegazioak egin, horiei erantzun eta egin beharreko aldaketak egin direla, alegia». Haatik, eta salatu duenez, errealitatea bestelakoa da; «aurkeztu zuten berrikuspen proiektua hain aldrebesa zenez gero, orain proposatzen dituztenak beste arau batzuk dira, berriak». Horiek hala, arauen tramitazioa hasieratik egin beharko litzatekeen arren, Hernaniko Udala bestela jokatzen ari dela kritikatu dute. Ondorioz, «hasieran onartu zutena eta orain agertu dutena berdinak» ez direla nabarmendu du Bildu Hernanik.

Horretaz gain, gaur egun arau subsidiarioen edozein berrikuspen proiektuk «ingurumenaren inguruko azterketak behar bezala eginda edukitzea» ezinbestekoa dela esan du Bildu Hernanik. Hor ere Hernaniko Udalak ez duela zuzen jokatu salatu dute: «Hasieran onartutako dokumentuarekin pauso hori erdizka eman zuten. Orain aldaketa garrantzitsuak egin dituzte eta, beraz, ingurumenean izango duten eragina ez da bera izango. Legearen arabera beste azterketa bat egin beharko litzateke». Parte hartzearen arloan ere ikusi ditu gabeziak plataformak. «Jendaurrean jarri den dokumentua partziala da, ez ditu jasotzen Udalbatzan jasotako erabaki guztiak», agertu du.

Gauzak horrela, arau subsidiarioek «herriaren etorkizunerako daukaten garrantzia» nabarmendu du Bildu Hernanik eta, beraz, «azterketa sakona eta mardula behar dutela» gaineratu du.

Zestoan herri batzarra