Elkano Browning Cream jaioberria, Jazzaldian
·Hiru kontzertu emango ditu, igandean, astelehenean eta asteartean
Hainbat jatorriko musikariek osatzen dute Elkano Browning Cream taldea; Mikel Azpiroz euskaldunak, New Yorkeko Matt Hardingek eta Parisko Franck Mantegarik. Euren elkarlanaren berri eman eta Donostiako Jazzaldian hiru kontzertu emango dituztela iragarri zuten.
DONOSTIA
«Ongi ezagutzen dut Mikel Azpiroz piano-jotzailearen ibilbide musikala, Lau Behi eta Parafunk taldeetan egindako lana... Horregatik, asko poztu naiz azken proiektua, Elkano Browning Cream, Donostiako Jazzaldian aurkeztu duelako. Matt Harding estatubatuarrarekin eta Franck Mantegari frantsesarekin batera, disko benetan ona kaleratu du, eta guretzat ohorea da Jazzaldian hiru kontzertu ematea», baieztatu zuen jaialdiaren zuzendari Miguel Martinek.Matt Harding eta Mikel Azpiroz aspaldiko lagunak dira. Orain hogei urte, institutuan zebiltzala ezagutu zuten elkar. Franck Mantegari Parisko bateria-jotzailea, aldiz, New Yorkera bizitzera joan zen orain urtebete, abentura musikalen bila. Han elkar ezagutu, eta elkarrekin jotzen hasi ziren. Ordutik, urtean hainbat aldiz elkartzen dira birak egiteko. Bira horietako batean jaio zen, hain zuzen ere, Elkano Browning Cream proiektua, Matt Hardingen diskoa aurkezten ari zirela. «Denbora anitz ematen genuen elkarrekin, bidaia luzeak egiten genituen. Urtarrilean Txinara joateko aukera izan genuen, Shanghaiko jazz klub batera, eta han grabatu genuen diskoa. ‘Mamusik’ izeneko zigilua sortu dut lanak kaleratzeko, nahiago dudalako produktua nik neuk kontrolatu», azaldu zuen Mikel Azpiroz piano-jotzaileak. Bederatzi abesti biltzen ditu diskoak, horietatik zortzi instrumentalak dira eta bestean Matt Hardingek kantatzen du. Gehien-gehienak musikari donostiarrak azken urteotan konposatuak dira, baina bada tartean abesti ezagunik ere; “Agur Jaunak”. Azpirozek esan zuenez, zuzenean jotzen dutenean entzuleei ezaguna egiten zaie. Ez dira zein kantu den ohartzen, ordea. Jazzaldiko zuzendariak bigarrena entzutera animatu zuen jendea, «hagitz berezia delako». Elkano Browning Cream izena oso bitxia da, baita bere jatorria ere. «San Telmoko erakusketa batean izan nintzen, Donostiako objektu eta iragarki zaharrak ikusten. Eguzkitik babesteko krema baten iragarkia zegoen tartean, Elkano Browning Cream, eta diskoaren espirituarekin bat zetorrela konturatu nintzen», ekarri zuen gogora Azpirozek. «Donostiako Jazzaldia bihotzean daramadanez, lana bertan aurkez nezakeen galdegin nion Miguel Martini. Izebekin joaten nintzen Belodromora kontzertuak ikustera, 80ko hamarkadan. Pribilegiatua naizela iruditzen zait, ziur asko Mattek Ameriketako Estatu Batuetan baino artista gehiago ikusi dudalako Donostian. Jazzaldiak eragin handia izan du nigan, estiloak aukeratzerakoan eta jotzerakoan», adierazi zuen.
|
