EHEk ofizialtasuna eskatuko du igandean Baionan
BAIONA
«Baionan euskaraz, ofizialtasuna» lelopean Euskal Herrian Euskaraz (EHE) taldeak elkarretaratzea antolatu du igande honetarako, goizeko 11.30ean, Lapurdiko hiriburuko San Andres elizaren aurrean. Festak direla-eta, Baionako eta Iruñeko alkateek, Jean Grenetek eta Yolanda Barcinak, ekitaldi bat egingo dute herriko etxean bi hirien arteko ahaidetzea dela-eta. Bai batak zein besteak euskararen kontrako neurri ugari hartu dituztela Baionan eta Iruñean gogora ekarri zuen EHEk. «Bi udalek euskararen kontra indarrean dituzten hizkuntza politikak salatu nahi ditugu, horietan agintari diren horien aitzinean protesta eginez», azaldu zuen EHEk. Horrekin batera, Baionako jaietan euskarak jasaten duen «errespetu eza eta bazterketa» ere arbuiatuko dutela gaineratu zuen EHEk.
Bestetan ere bai
«Bestetan ere euskarari dagokion errespetuzko lekua aldarrikatuko dugu, Baionarako bezalaxe Euskal Herri osoko herri guztietarako», nabarmendu zuen talde euskaltzaleak. Bide batez, Baionako elkarretaratzean euskaldunen hizkuntza eskubideak errespetatuak izateko euskarak Euskal Herri osoan ofizialtasuna behar duela adieraziko dute.
|
