DONOSTIA

Ama Guadalupekoa eta Plentzitarra ontziek ohorezko txandan egingo dute arraunean, Isuntzako Lekittarrarekin eta Zarauzko Enbatarekin batera. Aurretik, Orio, Zumaia, Urdaibai eta Ondarroa izango dira lehenengo txandan.

Orain arte jokatutako probetan, Traineruen Kluben Elkarteko (TKE) San Miguel Ligakoetan zein bestelakoetan, Hondarribia jaun eta jabe izan da. Mikel Orbañanosek zuzentzen duen taldea denboraldi biribila egiten ari da, eta azken urte bietako Euskadiko txapeldunak izanik eurak dira kinieletan hoberen sailkaturik daudenak. Gauzak behar bezala joanez gero, gipuzkoarrek irabazi beharko lukete, baina estropadak uretan jokatzen dira, eta eremu horretan erakutsi behar da nagusitasuna. Faboritismoak, beraz, anekdotikoak direla esan daiteke.

Arkote da kinieletan bigarren sailkatuta dagoen taldea. Plentziarrak beren zaleen aurrean arituko dira arraunean, eta horrek motibazio gehigarria emango die. Gainera, ostegunean erraz gailendu ziren Bizkaiko Txapelketan, eta Gipuzkoako txapelduna ezustean hartu nahi dute. San Miguel Ligan Plentzian jokatu zen proban hirugarren sailkatu ziren Jose Carlos Popi Gonzalezen mutilak, hondarribiarrengandik zazpi segundora, eta estropada eremua menperatuta dute.

Zarautzek ere aukerak izan ditzake. Gipuzkoan bigarren sailkatu ziren, eta zarauztarrak oso lan txukuna egiten ari dira TKE Ligan. Enbatak ez du ezer galtzeko gaur, eta aintzat hartzeko ontzia izango da.

Isuntzak, berriz, zaila izango du titulua eskuratzea. Lekeitiarrek lan bikaina egin zuten Bizkaikoan, Urdaibairen aurretik sailkatu ziren, eta Euskadikoaren ohorezko txandan izatea saria da haientzat.

Argi, halaber, itsasoaren baldintzekin. Izan ere, lehen txandaren eta bigarrenaren artean aldeak egon daitezke, eta horri probetxua atera diezaiokete uretan izango diren lau taldeek. Orioko San Nikolas eta Urdaibaiko Bou Bizkaia ontziek, koadrila indartsuak izanik, aurrean egon beharko lukete, baina Zumaia eta Ondarroa aurrean egoten ahaleginduko dira.