Bost litroko isurketa garbitu dute Busturiko kobazulo batean
BUSTURIA
Lakuako Gobernuko Ingurumen Sailak isurketa baten ondorioz Busturiko San Pedro kobazulora heldutako bost litro inguru hidrokarburo garbitu ditu. Bizkaiko herri horretara bertaratutako teknikariek kobazuloko ura dagoeneko garbi dagoela ziurtatu dute. Horrez gain, Lakuakoek jakinarazi dutenez, teknikariek ez dute isurketaren ondorioz hildako arrain edo saguzarren gorpu bat bera ere topatu.Ingurumen Sailak ohar batean adierazi duenez, larunbatean izan zuten Busturiko San Pedro kobazuloan izandako isurketaren berri, eta egun horretan bertan agindu zion Ekonor enpresari garbiketa lanak lehenbailehen egin zitzala. Aurretik, ordea, Ingurumen Saileko teknikariek kobazuloaren azterketa sakona egin zuten, kaltea norainokoa izan zitekeen jakiteko. Oharrak dioenez, ez Ingurumen Saileko teknikariek ezta Ekonor enpresakoek ere ez zuten inolako zailtasunik izan kobazulora sartzeko, eta bi lantaldeetako batek ere ez zuen, gainera, arrain edo saguzarren gorpurik topatu. San Pedroko haitzuloan izandako teknikarien esanetan, gehienez ere bost litroko isurketa izan zen, «bidoi batean sartzen dena», zehaztu zuten. Dagoeneko isurketa guztia garbituta dutela eta kobazuloko ura garbi dagoela ziurtatu dute Lakuako Ingurumen Saileko teknikariek.
|
